१९ असार २०७९ शनिबार
कर्णाली प्रदेश सरकारका भूमि व्यवस्था, कृषि तथा सहकारी मन्त्री चन्द्रबहादुर शाहीले ड्रागन फ्रुट खेती कर्णालीका लागि नयाँ सुरुआत भएको बताउनुभएको छ ।
प्रदेश राजधानी वीरेन्द्रनगर नगरपालिका १२ सुर्खेत नेवारेस्थित मालिका कृषि तथा ड्रागन फ्रुट फर्मको आज उद्घाटन गर्दै सहकारीमन्त्री शाहीले मेहनती कृषकका कारण कृषि क्षेत्र व्यवसायिक प्रवद्र्धन र उन्नति हुने बताउनुभयो । उहाँले भन्नुभयो, “ड्रागन फ्रुट उत्पादनमा वृद्धि गर्नुस्, बजारीकरणमा समस्या देखिए प्रदेश सरकारले त्यसको सहजीकरण गर्छ ।”
कर्णाली प्रदेशको आर्थिक समृद्धिमा कृषि क्षेत्रको ठूलो भूमिका रहेको भन्दै मन्त्री शाहीले व्यवसायिक र पौरखी कृषकहरुका लागि सरकारले आवश्यक सहयोग गर्ने विश्वास दिनुभयो । कुनैपनि निकायको सहयोगविना लाखौंको लगानी गरेर यहाँको अर्थतन्त्रमा सहयोग पुर्याउने अभियानमा लागेको भन्दै फर्मका सञ्चालिका पद्मा रावत (बुढा)लाई उहाँले धन्यवाद व्यक्त गर्नुभयो ।
सञ्चालिका बुढाले एक वर्षदेखि शुरु गरेको फर्मले उत्पादित एक क्विन्टल ड्रागन फ्रुट बजारमा पठाइएको जनाउनुभयो । उहाँले भन्नुभयो, “२८ कट्ठा जमीन भाडामा लिएर रु.७० लाखको एकल लगानीमा ड्रागन फ्रुटको खेती गरिएको छ । एक सिजनमा प्रतिबोटले न्यूनतम पाँच केजीका दरले १३ हजार केजी दिने अपेक्षा गरेका छौं ।”
उत्पादन गरिएको ड्रागन फ्रुट बिक्रीका लागि बजार लिनु नपरेको र अहिले सबै फर्ममा आएर किन्ने गरेको उहाँले बताउनुभयो । बुढाका अनुसार प्रतिकेजी रु.८०० का दरले ड्रागन फ्रुट बिक्री गर्ने गरिएको छ । एक सिजनमा १३ हजारका दरले वर्षमा ५२ हजार किलो ड्रागन फ्रुट उत्पादन हुने फर्मले अनुमान गरेको छ ।
