१८ साउन २०८३, सोमबार
सुर्खेतः कर्णाली प्रदेश सरकारका मुख्यमन्त्री मंगलबहादुर शाहीले खाना पकाउने एलपी ग्याँस अभावबारे अनुगमन प्रभावकारी बनाउन निर्देशन दिनुभएको छ ।
मुख्यमन्त्री तथा मन्त्रिपरिषद्को कार्यालय सुर्खेतमा आज बसेको उच्चस्तरीय आकस्मिक छलफलमा बोल्दै मुख्यमन्त्री शाहीले आम नागरिकको भान्सा र दैनिक जीविकासँग जोडिएको संवेदनशील विषयमा कसैले पनि खेलबाड गर्न नहुने बताउनुभयो । उहाँले सुरक्षा निकाय र बजार अनुगमन टोलीलाई तत्कालै बजारमा खटिएर कृत्रिम अभाव सिर्जना, अनधिकृत भण्डारण वा उपभोक्तासँग बढी मूल्य असुल्ने जो कोहीलाई कानुनी कारवाही गर्न र अनुगमनलाई थप प्रभावकारी बनाउन निर्देशन दिनुभयो ।
वीरेन्द्रनगरलगायत आसपासका क्षेत्रमा विगत केही दिनदेखि भइरहेको ग्याँसको अभावप्रति प्रदेश सरकारले गम्भीर चासो देखाएको उल्लेख गर्दै मुख्यमन्त्री शाहीले उपभोक्ताहरुलाई मारमा पर्न नदिन र बजारमा ग्याँसको अभाव नरहेकाले आतंकित नभई आफ्नो नियमित आवश्यकता प्रतिका लागि मात्र ग्याँस खरिद गर्न आग्रह गर्नुभएको छ । सो समयमा व्यवसायीहरुले आगामी केही दिनभित्रै वितरण प्रणालीलाई पारदर्शी र व्यवस्थित बनाएर बजारमा आपूर्ति सहज पार्ने प्रतिबद्धता जनाएका थिए ।
छलफलका क्रममा आपूर्तिसम्बन्धी वास्तविक तथ्याङ्क प्रस्तुत गर्दै नेपाल आयल निगम सुर्खेतका प्रमुख दिपक घिमिरेले पछिल्लो १७ दिनमा मात्रै सुर्खेत र आसपासका बजारमा ३३ हजार ४४० सिलिण्डर ग्याँस बिक्रीवितरण भइसकेको जानकारी दिनुभयो । आयल निगम तथा सम्बद्ध व्यवसायीहरुका अनुसार भारतबाट हुने आयात र बजारमा पठाइने ग्याँसको परिमाणमा कुनै कटौती नभई आपूर्ति अवस्था पूर्णरुपमा सामान्य रहेको बताएको उहाँले बताउनुभयो ।
आपूर्ति नियमित हुँदाहुँदै पनि उपभोक्ताहरु ग्याँसका निम्ति राति २ः०० बजेदेखि नै लाइनमा बस्नुपर्ने बाध्यता सिर्जना हुनुमा प्राविधिक तथा मनोवैज्ञानिक कारण भएको जनाइएको छ । सरकारले केही समयअघि लागू गरेको आधा सिलिन्डर (७.१ केजी) को व्यवस्थालाई खारेज गरी पुनः पुरा सिलि०डर (१४.२ केजी) वितरण गर्ने निर्णयले बजारको वितरण प्रणालीमा आकस्मिकरुपमा चाप बढेको हो ।
ग्याँस बिक्रेताका अनुसार बजारमा ग्याँसको अभाव हुन सक्ने हल्ला र त्रासका कारण सर्वसाधारणले खाली रहेका सबै सिलिण्डर एकैपटक साट्ने तथा आवश्यकताभन्दा बढी ग्याँस घरमा भण्डारण गर्ने प्रवृतिले कृत्रिम अभावजस्तो देखिएको हो । बैठकमा प्रदेशका उच्च सुरक्षा अधिकारीहरु, नेपाल आयल निगमका प्रमुख र ग्याँस बिक्रेताहरुको सहभागिता रहेको थियो ।
्
