२४ असार २०७९, शुक्रबार
राउटे युवतीमाथि यौन दुर्व्यवहार गरेको आरोप लागेका सुर्खेत गुर्भाकोटका तीन जना आरोपितलाई अदालतले सात वर्षको जेल सजाय तोकेको छ ।
जिल्ला न्यायाधीश डा.राजेन्द्रकुमार आचार्यको इजलासले बिहीबार राउटे युवतीमाथि यौन दुर्व्यवहार गर्ने गुर्भाकोट नगरपालिका ९ सुर्खेतका चौमनबहादुर घर्ती र भूपेन्द्र बुढामगरलाई सात÷सात वर्ष जेल सजाय र जनही रु.दुई लाख जरिवाना तोकेको हो । अदालतले यौन दुर्व्यवहार भएको होटलका सञ्चालकलाई तीन वर्ष छ महिना जेल सजाय र रु.एक लाख जरिवाना तोकेको जिल्ला अदालत सुर्खेतका सूचना अधिकारी उज्ज्वलदेव रावलले जानकारी दिनुभयो ।
उहाँका अनुसार सात÷सात वर्ष जेल सजाय पाएका घर्तीमगर र बुढामगरले पीडित राहत कोषमा जनही रु.आठ हजार र होटल सञ्चालक पुनले रु.चार हजार पीडित राहत कोषमा जम्मा गर्नुपर्ने फैसलामा उल्लेख गरिएको छ ।
बोटेचौरको शुभकामना होटलमा विसं.२०७८ जेठ २१ गते राति ९ः०० बजे राउटे युवतीमाथि यौन हिंसा गरेको आरोपमा तीनै जनालाई जेठ २३ गते बिहान प्रहरीले पक्राउ गरेको थियो । घर्ती तथा बुढा मगरले राउटे युवतीलाई मदिरा खुवाएर यौन हिंसा गरेको भिडिओ सार्वजनिक भएपश्चात् उनीहरु पक्राउ परेका थिए ।
अदालतले असार १६ गते पुर्पक्षका लागि तीनै जनालाई जेल चलान गरेको थियो । उक्त समयमा राउटे समुदाय गुर्भाकोट नगरपालिका ११ सुर्खेत आँपसोतीस्थित भेरी नदीको किनारामा बस्दै आएका थिए ।
