१६ असोज २०७८, शनिबार
नेकपा (माओवादी केन्द्र) निकट पत्रकारहरुको संगठन प्रेस सेन्टर नेपालको राष्ट्रिय महाधिवशेन आगामी कार्तिकमा सम्पन्न हुने भएको छ ।
नेकपा हुँदाको बखत प्रेस सेन्टर र प्रेस चौतरी मिलेर बनेको प्रेस संगठन नेपालको आज बसेको केन्द्रीय समितिको पूर्ण बैठकले प्रेस संगठन नाम हटाएर प्रेस सेन्टर नै कायम राख्ने निर्णय गरेको हो । उक्त बैठकमा प्रेस सेन्टरका सातवटै प्रदेशका संयोजकहरुले आ आफ्नो प्रदेशको सांगठानिक अवस्था, संगठन सञ्चालनमा देखिएका समस्या एवं चुनौति, समाधानका लागि गरिएका प्रयास तथा आगामी योजनासहित अघि बढ्न चालिएका कदमका विषयमा रिपोटिङ् गरेका थिए ।
भौतिक तथा भर्चुअल माध्यमबाट बसेको उक्त बैठकमा नेकपा माओवादी प्रचार विभागका प्रमुख तथा स्थायी समिति सदस्य कृष्णबहादुर महराले जनचाहना अनुसार पार्टी अघि बढ्ने बताउनुभयो । मुलुकको उन्नयन र दिगो विकासका लागि प्रेस जगतले सँधै पहरेदारको भूमिका निर्वाह गर्दै आएको बताउँदै स्थायी कमिटि सदस्य महराले समाज परिवर्तनमा पत्रकारहरुले विशेष सहयोग पुर्याउने जनाउनुभयो ।
बैठकले असोज मसान्तसम्म सदस्य वितरण तथा नवीकरण गर्ने र कार्तिक ८ गतेसम्म जिल्ला अधिवेशन सम्पन्न गर्ने निर्णयले गरेको संयोजक महेश्वर दाहालले जानकारी दिनुभयो । संयोजक दाहालका अनुसार बैठकको निर्णयसँग केन्द्रीय समिति अधिवेशन आयोजक समिति र सबै समितिहरु अधिवेशन आयोजक समितिमा परिणत भएका छन् ।
त्यस्तै, महाधिवेशनबाट पारित गर्ने गरी संगठनको विधान प्रस्ताव गरिएको छ । विधानमा संघ, प्रदेश र स्थानीय पालिकाका शाखाहरुलाई बलियो प्रस्ताव गरेको छ । पालिका समिति नबन्दासम्म जिल्ला समन्वय समिति नै कामकाजी हुने जनाईएको छ ।
