१९ असार २०७९, आइतबार
जिल्ला कारगार सुर्खेतमा क्षमता भन्दा बढी कैदी बन्दी हुँदा समस्या भएको छ । पुरुष ७० र महिला ३० जना अट्ने क्षमता भएको उक्त कारागारमा हाल ३३२ जनालाई राख्ने काम भएको छ ।
अहिले उक्त कारगारमा ७० जना पुरुष अट्ने ठाउँमा ३३२ र ३० जना महिला अट्ने ठाउँमा ४३ जना राखिएको जिल्ला कारागार सुर्खेतका सूचना अधिकारी (नायब सुब्बा) भुवन गौतमले राससलाई जानकारी दिनुभयो । उहाँका अनुसार पुर्पक्षका लागि थुनामा ६६ पुरुष र ८ महिला रहेका छन् । सबै गरी उक्त कारागारमा ३७५ जना कैदीबन्दी खचाखच हुने गरी राख्नुपरेकाे अवस्था छ ।
त्यस्तै, जबरजस्ती करणीका १७, लागुऔषधका १५ जना रहेको रहेको सूचना अधिकारी गौतमले बताउनुभयो । “पछिल्लो समयमा बहुबिबाह र चोरीका मुद्दा बढ्दै गएका छन्,” उहाँले भन्नुभयो, “अदालतबाट बहुबिबाह गरेको कसुरमा जेल सजाय तोकिएका नौ र चोरीका आठ जना कैदी बन्दी रहेका छन् ।”
उक्त कारागारका जेलर लक्ष्मी खरेलले क्षमता भन्दा बढी कैदी बन्दी भएको समस्यालाई समाधान गर्ने नयाँ भवन बनिरहेको बताउनुभयो । “अब थप क्षमताको तत्काल अर्को भवनको निर्माण कार्य चालु आवमै सम्पन्न हुने गरी भईरहेको छ,” जेलर खरेलले भन्नुभयो, “एउटै ठाउँमा कैदीहरु खचाखच हुँदा संक्रमण बढ्ने खतरा भएपनि त्यसको प्रभाव परेको छैन ।”
