१५ फागुन २०७८, आइतबार
विपरीत दिशाबाट आएको फोर्स गाडीको ठक्करबाट घाइते भई उपचारको क्रममा मृत्यु भएका भेरीगंगा नगरपालिकाका १ सुर्खेतका वडाध्यक्ष नवराज कार्कीको शोकमा नगरपालिकाभर सार्वजनिक विदा दिईएको छ ।
भेरीगंगा नगरपालिकाले मृतक वडाध्यक्षको मृत्युको शोकमा एक शोक वक्तव्य जारी गर्दै आज वडा कार्यालयसहित नगरपालिका भित्रका सबै सरकारी कार्यालयमा सार्वजनिक विदा दिएको हो । काठमाडौंस्थित बाँसबारी न्यूरो अस्पतालकमा उपचारको क्रममा शुक्रबार राति वडाध्यक्ष कार्कीको मृत्यु भएको थियो ।
यही फागुन ८ गते वडा कार्यालयबाट नगरपालिकाको बैठकमा सहभागी हुन आउँदै गरेको अवस्थामा भेरीगंगा नगरपालिकाका १२ सुर्खेतस्थित राजीगाउँमा वडाध्यक्ष सवार भे.६.प ४४०१ नम्बरको मोटरसाइकललाई नेपालगञ्जबाट सुर्खेत आउँदै गरेको कर्णाली प्रदेश ०२००१ ख ०५४६ नम्बरको फोर्स गाडीले ठक्कर दिएको थियो ।
उक्त दुर्घटनामा परी उपचारको क्रममा मृत्यु भएका ३० वर्षीय वडाध्यक्ष कार्की विसं.२०७४ सालको स्थानीय तहको निर्वाचनमा नेकपा माओवादी केन्द्रबाट वडाध्यक्षमा निर्वाचित हुनुभएको थियो । विसं.२०४८ सालमा जन्मिनुभएका उहाँ सुर्खेत जिल्लाकै सबैभन्दा कान्छा वडाध्यक्षका रुपमा परिचित हुनुहुथ्यो ।
