१४ पुस २०७८, बुधबार
चिसो बढेसँगै विद्यालय बन्द भएपछि हिमाली जिल्लाका बालबालिकाहरुलाई मोर्डना खोप दिन समस्या भएको छ । चिसोमा हिउँदे विदाका कारण विद्यालय बन्द हुने भएकोले स्वास्थ्यकर्मीका लागि बालबालिकालाई खोप लगाउन समस्या भएको हो ।
विद्यालयमा बालबालिका नभेटिने भएपछि स्वास्थ्यकर्मीहरु विद्यालयमा सञ्चालित ट्युसन कक्षामा पुगेर उनीहरुलाई मोर्डना खोप दिने व्यवस्था मिलाईएको जिल्ला प्रशासन कार्यालय जुम्लाका प्रमुख जिल्ला अधिकारी विजयाकुमारी प्रसाईले जानकारी दिनुभयो । “जुम्लामा १८ वर्ष मुनिका बालबालिकाहरुका लागि १३ हजार मोर्डना खोप आएको छ,” प्रमुख जिल्ला अधिकारी प्रसाईले भन्नुभयो, “आजका दिनसम्म सात हजार बालबालिकाहरुलाई लगाइसकिएको छ ।”
मंगलबार जुम्लाको हिमा गाउँपालिकाको महावैपातरखोला विद्यालयमा पुगेर बालबालिकाका खोपको अवस्था बुझेर फर्केको जानकारी दिँदै उहाँले चिसो बढेसँगै हिजोदेखि हिमपात भइरहेकोले स्वास्थ्यकर्मीलाई खोप लगाउन सकस भएको बताउनुभयो । प्रजिअ प्रसाईंका अनुसार आज पनि जुम्लामा हिमपात भइरहेकोले स्थानीयलाई यहाँका विभिन्न चोक चोकमा दाउरा जगेडा गरेर आगो बाल्न लगाइएको र न्यानो कपडा लगाउन सुझाइएको छ ।
चन्दननाथ नगरपालिका जुम्लाका जनस्वास्थ्य निरीक्षक क्षेत्रबहादुर महतले नगरपालिकाभित्र सञ्चालन भएका ट्युसन सेन्टरमा पुगेर १२ वर्षमाथि र १८ वर्ष मुनिका बालबालिकाहरुलाई मोर्डना खोप लगाईएको बताउनुभयो । नगरपालिकामा दुई हजार २८६ बालबालिकालाई खोप लगाइसकिएको बताउँदै जनस्वास्थ्य निरीक्षक महतले आज हिमपात भइरहेकोले घाम लाग्ने बित्तिकै बाँकी बालबालिकालाई खोप दिने र २५ गतेभित्र सम्पन्न गरिसक्ने जनाउनुभयो ।
तातोपानी गाउँपालिकाका अध्यक्ष नवराज न्यौपानेले बुढापाकाको भनाईलाई उद्रित गर्दै पुसको १२ देखि १७ सम्म हिउँ पर्नुले सुविकाल फर्कने मान्यता रहेको बताउनुभयो । यसबाट किसानहरु धेरै खुशी रहेको जनाउँदै अध्यक्ष न्यौपानेले बेलकुण्ड माईत गएको अवस्था र पोइल आउँदा हिउ ल्याएको भन्ने विश्वास राखिन्छ ।
हिमपातका कारण सरकारी सार्वजनिक कामकाज प्रभावित भएको यद्यपि स्थानीय कृषकहरु खुशी भएको जिल्ला प्रशासन कार्यालय जुम्लाले जनाएको छ । कर्णालीका उच्च हिमाली जिल्लाहरु हुम्ला, डोल्पा, मुगु, जुम्लाका सबै र कालीकोट, जाजरकोट, दैलेखको माथिल्लो बस्तीको जनजीवन प्रभावित भएको सम्बन्धित जिल्लाका प्रमुख जिल्ला अधिकारीहरुले जनाएका छन् ।
यता हावापानी फिल्ड कार्यालय जुम्लाका प्रमुख मिना खत्रीले हिजोदेखिको हिमपातले तापक्रम घट्दो अवस्थामा पुगेको बताउनुभयो । प्रमुख खत्रीका अनुसार आज जुम्लाको न्यूनतम तापक्रम ०.६ डिग्री सेल्सियस छ भने २.८ मिलिमिटर हिउ परेको छ । मौसमी आद्रता ९६.९९ पुगेको जनाईएको छ ।
