२७ मंसिर २०७८, सोमबार
कर्णाली प्रदेशका शिक्षक नेताहरुले जनवर्गीय संगठनका प्रमुखहरुलाई पार्टी कमिटिमा समेट्न अनुरोध गरेका छन् । शिक्षक नेताहरुले नेकपा (माओवादी केन्द्र) कर्णाली प्रदेशको प्रथम सम्मेलनको बन्द सत्रमा कर्णाली प्रदेश इञ्चार्ज शक्तिबहादुर बस्नेतसहितको पार्टी नेतृत्वको टोलीलाई माग पत्रसहित अनुरोध गरेका हुन् ।
एकीकृत अखिल नेपाल शिक्षक संगठन (अन्टाओ) केन्द्रीय उपाध्यक्ष तथा कर्णाली प्रेदशका इञ्चार्ज शान्ति ढकाल, केन्द्रीय सचिव तथा कर्णाली प्रदेश अध्यक्ष रेश्मीलाल चपाई र केन्द्रीय सदस्य तथा कर्णाली प्रदेश उपाध्यक्ष सुशिला शर्मासहितको संयुक्त टोलीले जनवर्गीय संगठनका गाउपालिका र प्रदेश र केन्द्रका अध्यक्ष र इन्चार्जहरुलाई गाउपालिका, प्रदेश र केन्द्रको पाटी कमिटीमा लैजाने व्यवस्था गर्नुपर्ने एकल माग पेश गर्नुभएको हो ।
शिक्षक, कर्मचारी, स्वास्थ्यकर्मी, महिला, विद्यार्थी, किसान, दलित, आदिवासी÷जनजातिलगायतका जनवर्गीय संगठनमा भएका आवश्यकता, समस्या, चुनौति र उपलब्धिहरुका विषयमा पार्टी कमिटिलाई जानकारी हुने र त्यसले सिंगो पार्टी संगठनलाई चलायमान बनाउन सघाउ पुर्याउने भएकोले प्रदेश पार्टी नेतृत्वसहित केन्द्रसँग माग गरेको शिक्षक संगठनका केन्द्रीय उपाध्यक्ष तथा कर्णाली प्रेदश इञ्चार्ज ढकाल जानकारी दिनुभयो ।
संगठनका केन्द्रीय सचिव तथा कर्णाली प्रदेश अध्यक्ष चपाईले स्थानीय तहसम्म रहेर जनवर्गीय संगठनसहित जनताको आवश्यकता र समस्यालाई पार्टी तहमा पुर्याउन जनवर्गीय संगठनले पुलको काम गर्ने र त्यसले पार्टी बलियो बनाउन र निरन्तरको सम्बन्ध कायम राख्न सहयोग पुग्ने बताउनुभयो । शिक्षक नेताहरुले राखेका मागलाई पार्टी तहबाट सकरात्मक ढंगले अगाडि बढाउने जनाईएको छ ।
