१० मंसिर २०७८, शुक्रबार

जुम्लाको तिला गाउँपालिका–९ रासाँगाउँको धारा खोलास्थित बालुवा खानीमा पुरिएर दुई किशोरीको मृत्यु भएको छ।

उक्त वडाका १९ वर्षीया निली रावत र १५ वर्षीया निरमाया रावत धाराखोलास्थित बालुवा खानीमा पुरिँदा मृत्यु भएको हो। स्थानीयबासी बिनबहादुर रावतका अनुसार शुक्रबार बिहान ७ बजे बालुवा संकलनका लागि बालुवा खानी पसेका थिए।

बालुवा सोर्दै गर्दा खानी भत्किएर पुरेकाले दुवै किशोरीको घटनास्थलमै मृत्यु भएको हो। घटनास्थल जुम्ला सदरमुकाम खलङ्गाबाट ४० किलोमिटर टाढा रहेको छ । उक्त घटनाको खबर प्राप्त भएलगत्तै रारास्थित प्रहरी चौकीका सुरक्षाकर्मी घटनास्थलतर्फ गएको जिल्ला प्रहरी कार्यालय जुम्लाका सूचना अधिकारी युवन चौधरीले जानकारी दिनुभयो ।