२८ बैशाख २०७८, मंगलबार
विश्वव्यापी महामारीका रुपमा फैलिएको दोस्रो लहरको नयाँ भेरियन्टसहितको कोरोना संक्रमणविरुद्ध डोल्पामा कार्यरत कर्मचारी जुटेका छन् ।
जुम्ला घर भई डोल्पा जिल्लाका विभिन्न सरकारी निकायमा कार्यरत कर्मचारी तथा व्यापार व्यवसायीहरुले पछिल्लो समयमा भयावह बन्दै गएको कोरोना संक्रमणसँग जुध्न आज विपद् व्यवस्थापन समिति गठन गरेका छन् । जुम्ला निवासी कृषि विकास बैंक डोल्पाका शाखा प्रबन्धक गोर्खबहादुर बुढ्थापाको संयोजकत्वमा ११ सदस्य विपद् समिति गठन गरिएको छ ।
समितिको सदस्यहरुमा विष्णुभक्त चौलागाई, केशवराज जैसी, हस्तबहादुर बुढा, मुनप्रसाद जैसी, जनकबहादुर अधिकारी, विर्षबहादुर भण्डारी, अमरसिंह रावत, जयशंकर धिताल, विष्णुबहादुर शाही र कमल बोहोरा रहेका छन् । गठित समितिले कर्मचारी तथा व्यवसायीबाट प्रति व्यक्ति रु.पाँच हजार संकलन गर्ने र कोभिडको संभावित विपद् व्यवस्थापनमा खर्च गर्ने निर्णय गरेको संयोजक बुढ्थापाले जानकारी दिनुभयो ।
डोल्पामा कार्यरत जुम्लाका कर्मचारी तथा व्यवसायी गरेर हाल करिब ८० जनाउँदै संयोजक बुढ्थापाले भन्नुभयो, “कोभिड संक्रमित भईहाले बिरामीलाई तल लैजान डोल्पामा हेलिकोप्टरको विकल्प छैन । त्यसैले रु.दुई÷तीन लाख जम्मा हुने गरी कोष खडा गरेका छौं । यो महामारीमा पूर्वतयारी नगरे जो कोही ज्यान जान सक्छ ।”
संकलित कोषलाई सञ्चालन तथा व्यवस्थापन गर्न विष्णुभक्त चौलागाई, जनकबहादुर अधिकारी र विर्खबहादुर भण्डारीको नाममा कृषि विकास कार्यालय डोल्पामा खाता सञ्चालन गर्ने निर्णय भएको सदस्य कमल बोहोराले बताउनुभयो । सदस्य बोहोरका अनुसार जुम्ला स्थायी घर भई डोल्पामा कार्यरत कर्मचारी र व्यवसायीहरुलाई समितिमा आवद्ध हुन अनिवार्य रु.पाँच हजारदेखि माथि जम्मा गर्नुपर्ने निर्णय गरिएको छ ।
