२९ कार्तिक २०७८, सोमबार
अख्तियार दुरुपयोग अनुसन्धान आयोगको कार्यालय सुर्खेतले कर्णाली प्रदेशका प्रमुख तिलक परियारसमक्ष वार्षिक प्रतिवेदन पेश गरेको छ ।
आयोगको कार्यालय सुर्खेतका निमित्त कार्यालय प्रमुख भेषराज रिजालले नेपालको संविधानको धारा २९४ को परिच्छेद ८ अनुसार २८७ पृष्ठको वार्षिक प्रतिवेदन प्रदेश प्रमुखसमक्ष पेश गर्नुभएको हो । उक्त प्रतिवेदन ग्रहण गर्दै प्रदेश प्रमुख परियारले मुलुकको सुशासन र विकासविरुद्ध हुने भ्रष्टाचारजन्य कार्य निवारण तथा न्यूनिकरण आयोगको महत्वपूर्ण भूमिका रहेको बताउनुभयो ।
“अख्तियारका आगामी सञ्चालन हुने गतिविधिसहित कार्यसम्पादनले प्रभावकारिता बढाओस्,” उहाँले भन्नुभयो, “जसबाट गलत नियत राख्नेहरु निरुत्साहित बनोस् र नागरिकहरुलाई सुशासनको प्रत्याभूति होस् ।” उहाँले आयोगको आगामी कार्य प्रगतिको कामना गर्नुभएको थियो ।
उक्त कार्यक्रममा निमित्त प्रमुख रिजालले आयोग सुर्खेत कार्यालयले आर्थिक वर्ष २०७७÷०७८ मा गरेका कार्यसम्पादनबारे प्रदेश प्रमुखलाई प्रस्तुतिमार्फत जानकारी गर्नुभएको थियो । उहाँले उक्त आ.व.मा चिठीपत्र, ईमेल, पत्रपत्रिका, टेलिफोन, फ्याक्सलगायतका माध्यमबाट एक हजार २२० उजुरी परेकोमा ५७३ फछ्र्यौट भएको र बाँकी ६४७ उजुरी चाल आ.व.२०७८÷०७९ मा सरिआएको बताउनुभयो ।
निमित्त कार्यालय प्रमुख रिजालका अनुसार सबैभन्दा बढी स्थानीय तहका उजुरी परेका छन् । प्रतिवेदनमार्फत उच्च पदस्थ कर्मचारीहरुले सदाचारिता अपनाउनुपर्ने, सार्वजनिक खरिद प्रणालीमा सुधार आउनुपर्ने, उपभोक्ताबाट निर्माण हुने कार्यलाई व्यवस्थित गरिनुपर्ने, परामर्शदाताहरुलाई जिम्मेवार बनाउनुपर्नेलगायतका सुझाव दिईएको छ ।
