१३ असार २०८२, शुक्रबार
कर्णाली प्रदेशका मुख्यमन्त्री यामलाल कँडेलले पुरातात्विक साँस्कृति तथा ऐतिहासिक महत्व बोकेको काँक्रेविहारलाई कर्णालीको आर्थिक विकासको केन्द्रको रुपमा विकास गर्न सकिने बताउनुभएको छ ।
वीरेन्द्रनगर नगरपालिका वडा नं. ९ सुर्खेतद्वारा आयोजित ’काँक्रेविहार खोज अनुसन्धान तथा पर्यटन महोत्सव एवं युवा, बालबालिका तथा विद्यार्थी सम्मेलन २०८२’ लाई सम्बोधन गर्दै मुख्यमन्त्री कँडेलले काँक्रेविहारको महत्व बुझ्न र यसको सम्भावनालाई उपयोग गर्न सबै सरोकारवाला एकजुट हुनुपर्नेमा जोड दिनुभयो । उहाँले भन्नुभयो, “काँक्रेविहारलाई लुम्बिनीसँग पर्यटकीय रुपमा जोड्न सके यो क्षेत्र विदेशी र आन्तरिक पर्यटकको आकर्षणको केन्द्र बन्न सक्छ ।”
काँक्रेविहार धार्मिक, सांस्कृतिक र ऐतिहासिक दृष्टिले महत्वपूर्ण क्षेत्र भएकोले यसलाई प्रभावकारी ढंगले प्रचारप्रसार गर्न सके समग्र कर्णाली प्रदेशको आर्थिक स्वरुप परिवर्तन गर्न सक्ने मुख्यमन्त्री कँडेललको भनाई थियो । काँक्रेविहारलाई खुला चिडियाखानाका रुपमा विकास गर्न सकिने उल्लेख गर्दै त्यसले शिक्षा, पर्यटन र रोजगारीका क्षेत्रमा नयाँ सम्भावना खुल्ने उहाँले विश्वास व्यक्त गर्नुभयो ।
“पर्यटकीय पूर्वाधार, सूचना प्रविधि, वातावरण संरक्षण र स्थानीय सहभागितामार्फत काँक्रेविहारलाई व्यवस्थित गर्ने योजना आवश्यक छ,” उहाँले भन्नुभयो, “प्रचुर सम्भावना बोकेको काँक्रेविहारको विषयमा ठोस पहल गर्न हामी सबै एक हुनुपर्छ । अब सबै तहका सरकार, नागरिक समाज, अनुसन्धानकर्ता, विद्यार्थी र निजी क्षेत्र मिलेर काँक्रेविहारको पहिचान विस्तार गर्ने बेला आएको छ ।”
मुख्यमन्त्री कँडलले स्थानीय युवालाई काँक्रेविहारको सम्वद्र्धनमा सहभागी भइ आफ्नै क्षेत्रमा उद्यमशीलताको अवसर खोज्न पनि अपिल गर्नुभयो । पूर्वमुख्यमन्त्री तथा नेपाली काँग्रेस कर्णाली प्रदेशसभा दलका नेता जीवनबहादुर शाहीले हिन्दू र बौद्ध संस्कृतिको सङ्गम मानिने काक्रेविहारको संरक्षण र विकासले कर्णालीको आर्थिक वृद्धि र पर्यटन प्रवद्र्धनमा सघाउ पुग्ने बताउनुभयो । भाषा, संस्कृति, कला, साहित्य, सभ्यता, पुरातत्व र इतिहासमा गर्विलो पहिचान राखेको कर्णाली आन्तरिक तथा बाह्य पर्यटकका लागि मुलुककै आकर्षक गन्तव्य बन्ने उहाँको भनाई थियो ।
काँक्रेविहारमा धार्मिक, साँस्कृतिक, पुरातात्विक तथा ऐतिहासिक महत्वबारे ‘पर्यटन महोत्सव तथा विद्यार्थी सम्मेलन’ गरिएको थियो । उक्त महोत्वसमा डा.राजाराम सुवेदीले प्राचीन बौद्ध विहारका रुपमा परिचित काक्रेविहारको साँस्कृतिक, पुरातात्विक, धार्मिक र ऐतिहासिक महत्वको विषयमा कार्यपत्र प्रस्तुत गर्नु भएको थियो । त्यसमा प्राध्यापक पदमलाल देवकोटा, डाक्टरद्वय कृष्णचन्द्र शर्मा र महेन्द्र मल्लले टिप्पणी गर्नुभयो ।
विद्यार्थी, युवा अभियन्ता, अनुसन्धानकर्ताको उपस्थिति रहेको उक्त कार्यक्रममा समाजका विभिन्न क्षेत्रमा योगदान गर्नुभएका महत्वपूर्ण व्यक्तित्वहरुको सम्मानका साथै विद्यालयस्तरीय विज्ञान तथा शैक्षिक प्रदर्शनी र स्थानीय थारु, भोटेसहित अन्य आदिवासी समुदायहरुको समृद्ध साँस्कृतिक प्रस्तुतिहरु प्रदर्शन गरिएको थियो ।
