१९ असोज २०७८, मंगलबार
नेकपा (माओवादी केन्द्र)का कर्णाली प्रदेश समिति अध्यक्ष राजकुमार शर्माले मिडिया समाजको दर्पण भएको बताउनुभएको छ ।
प्रेस सेन्टर नेपाल कर्णाली प्रदेशको आज बसेको बैठकमा बोल्दै अध्यक्ष शर्माले बिगतमा डोके रेडियोबाट जनतालाई सुसूचित गर्ने प्रेस सेन्टर आज डिजिटल मिडिया पुगेको बताउनुभयो । संसारको व्याख्या नभई बदल्ने कुरामा जोड दिन र त्यसमा हरेकले आफुलाई बदल्नुपर्ने मत राख्दै उहाँले समाजका आवश्यकतामा मुखरित भएर सेन्टरलाई आफ्नो भूमिका फराकिलो बनाउन सुझाउनुभयो ।
माओवादी केन्द्रका प्रदेश सचिव रामदीप आचार्यले सूचना, विज्ञान र प्रविधिका कारण पत्र मञ्जुषामा पत्र खसाल्ने अवस्थाको अन्त्य भएको बताउनुभयो । प्रविधिमा आधारित सूचना मानव जातिको लागि बाँच्ने अनिवार्य शर्त जस्तै भएको छ, सचिव आचार्यले भन्नुभयो, अब प्रेस सेन्टरले सूचनालाई क्रान्ति, जनसेवा र समाज परिवर्तनका लागि उपयोग गर्नुपर्दछ ।
उहाँले जनताका लागि श्रमिकको भूमिकामा रहेर काम गर्ने पत्रकारहरुलाई पार्टी तथा सरकारले संरक्षकत्व प्रदान गर्नुपर्नेमा जोड दिनुभयो । बैठकमा सेन्टरका कर्णाली प्रदेश ईञ्चार्ज ध्रुवविक्रम बुढाथोकीले सांगठनिक अवस्था र संयोजक प्रतिक ईच्छुक शर्माले केन्द्रीय कमिटिको निर्णय तथा सर्कुलरबारे प्रदेश तथा जिल्ला सदस्यहरुलाई जानकारी दिनुभयो ।
उक्त बैठकमा प्रेस सेन्टरका प्रदेशका पदाधिकारी तथा सदस्यहरु, सल्लाहकार सदस्य, जिल्ला संयोजक, सहसंयोजकसहित सदस्यहरुको सहभागिता रहेको थियो । बैठकले जिल्ला समन्वय समितिको अधिवेशन कार्तिक ८ देखि १२ गते र प्रदेश अधिवेशन कार्तिक मसान्तसम्म सम्पन्न गर्ने निर्णय गरेको छ ।
