१९ भदौ २०७७, शुक्रबार
सामान्य अवस्थामा बिरामीलाई शल्यक्रिया गर्दा चिकित्सकहरुलाई केही हदको जोखिम मोल्नुपर्छ नै । खतराको बीचबाट सफल हुने शल्यक्रियाले अँझ बढी उनीहरुलाई पेशागत सन्तुष्टि मिल्छ । शल्यक्रियाबाट नयाँ जीवन प्राप्तिको अनुभव गर्नेहरुले व्यक्त गर्ने खुशी यथार्थमा चिकित्सकहरुको जीवनको सर्वोत्तम खुशी बन्छ ।
ती खुशीहरुले नै चिकित्सकहरुलाई जटिल परिवेशका माझमा थुप्रै चुनौतिसँग लड्ने उर्जा मिल्छ भन्ने उदाहरण पाउन सकिन्छ । यद्यपि त्यही उदाहरणीय काम कर्णाली स्वास्थ्य विज्ञान प्रतिष्ठान जुम्लामा कार्यरत स्त्रीरोग विशेषज्ञ डा.सुबी बस्न्यात नेतृत्वको टोलीले देखाएको छ ।
कर्णालीका सयौं महिलाहरुको प्रसव वेदनासँग साक्षात्कार डा.सुबी र उहाँ नेतृत्वको टोलीलाई विश्वव्यापी संकट बनेको नोबेल कोरोना भाइरस (कोभिड–१९) को त्रासका बीच सात गर्भवतीलाई सुत्केरी र शल्यक्रिया गर्नु सहज थिएन । तथापि यही महामारीको संकटमा उक्त टोलीले कोरोना संक्रमित पाँच गर्भवतीलाई सुत्केरी र दुईजनालाई शल्यक्रिया ग¥यो ।
“सामान्य सुत्केरीलाई शल्यक्रिया गर्दाको जोखिम त छँदै थियो तर यो महामारीको प्रकोपको बेलामा जोखिम झन् चरम बनेर आयो,” डा.बस्न्यातले भन्नुभयो, “कोरोना संक्रमित महिलाको सुरक्षित शल्यक्रिया गर्नुका साथै आफू पनि त्यो संक्रमणबाट बच्न त्यत्तिकै संयम हुनुपर्ने ।” शुरुको सिंजा गाउँपालिकाको कोरोना संक्रमित गर्भवतीलाई सुत्केरी गराउँदा निकै डर लागेर आएको उहाँले बताउनुभयो ।
उहाँले अगाडि भन्नुभयो, “जटिल परिस्थितिमा टोलीमा रहेर विशेष सहयोग पुर्याउन नर्स तथा अपरेशन थिएटरका सबै स्टाफको ठूलो भूमिका छ । सबैको संयुक्त प्रयासले आफूसहित कोरोना संक्रमित सुत्केरीको जीवन बचाउन र सुरक्षित राख्न सफल भयौं ।” टोलीले कालीकोट महावै गाउँपालिका, जुम्ला गुठिचौर, सिंजा, तिला गाउँपालिका र चन्दननाथ नगरपालिकाका कोरोना संक्रमित सात गर्भवतीको शल्यक्रिया र सुरक्षित सुत्केरी गराएको थियो ।
त्यसैगरी, उहाँको नेतृत्वमा स्त्रीरोग विशेषज्ञ डा.राजीव शाह, एनेस्थेसियोलोजिष्ट डा.रविन खातुङलगायतको टोलीले मुटु रोगी सिंजा गाउँपालिका जुम्ला र ज्वरो रोगी महावै गाउँपालिका कालीकोटको सुत्केरी गराउनुपर्ने कोरोना संक्रमितको सफल उपचार गरेर ज्यान जोगाएको थियो ।
स्त्रीरोग विशेषज्ञ डा.शाहले संक्रमित सात गर्भवती मध्य चार जनालाई सामान्य सुत्केरी, दुई जनालाई शल्यक्रिया र एक जना सेभेएर प्रिक्लाम्सिया भएको गर्भवतीको पनि उपचार गराईएको बताउनुभयो । “बन्दाबन्दी पूर्व प्रति महिनामा सुरक्षित गर्भपतनका १०–१५ केस आउने गरेकोमा त्यसपछि प्रति महिना ३०–४० केस आउने गरेका छन्,” उहाँले भन्नुभयो, “शायद बन्दाबन्दीका कारण गाउँमा स्वास्थ्य सेवा सहजै पाउन नसकेर अहिले गर्भपतनका केसहरु बढेको हुन सक्छ ।”
ढाई वर्षको छोरी छोडेर उपचार सेवामा डा.दम्पती :
काडमाडौं महानगपालिका १५ छाउनीका स्थायी निवासी स्त्रीरोग विशेष डा.सुबी बस्न्यात ढाई वर्षको छोरी छोडेर जुम्ला प्रतिष्ठान आएको अहिले सात महिना भयो । निर्वाध उपचार सेवामा खटिनु पर्दा घर जाने समय मिलेको छैन, उहाँलाई । यो समयमा गर्भवती महिलाहरुको केस बढी आउने भएकोले घर जान नपाईएको बताउनुहुन्छ, उहाँ ।
डा.सुबीको श्रीमान् एनेस्थेसियोलोजिष्ट डा.रविन खातुङ् पनि प्रतिष्ठानमै कार्यरत हुनुहुन्छ । डा.दम्पती घरयासी मामलालाई भन्दा सेवालाई प्रधान ठानेर अहोरात्र खटिरहनुभएको छ । कर्णालीका गर्भवतीसहित सबै महिलाका दुःख र भावना बुझ्दै आउनु भएकी डा.बस्न्यात र उहाँका श्रीमान्् बिगत सात वर्षदेखि प्रतिष्ठान जुम्लामा काम गर्दै आउनुभएको छ ।
“यतिबेला सिंगो विश्व कोरोना महामारीको चपेटामा छ । सामान्य अवस्थामा त आफ्नो ड्युटी पुरा गर्नुपर्दछ भने यो विषम घडीमा पछि हट्ने कुरै भएन,” उहाँले भन्नुभयो, “यहाँका महिलाहरुको स्वास्थ्य सेवामा कमि हुन नदिन म सेवामै खटिएकी छु ।” शुरुमा छोरीका लागि तीन÷तीन महिनाको अवधिमा घर जाने गरेपनि अहिले कोरोनाले त्यो अवस्था नरहेको उहाँले बताउनुभयो ।
मेडिकल अफिसरका रुपमा पाटन अस्पतालमा काम गर्दै गर्दा प्रतिष्ठान जुम्लाका तत्कालीन् उपकुलपति डा.पारसकुमार आचार्यको सहयोगमा विसं.२०७० सालमा डा.सुबी र उहाँको श्रीमान् डा.रविन जुम्ला आउनुभएको थियो । प्रतिष्ठानकै सहयोगमा डा.सुबीले एम.डी.ईन गाईनोलोजी र डा.रविनले एम.डी.ईन एनेस्थेसिया गर्नुभएको छ ।
काडमाडौं महानगपालिका १५ छाउनी स्थायी घर हुनुभएका डा.दम्पतिलाई जुम्ला प्रवेश शुरुमा असामान्य थियो । यद्यपि प्रवेश गरेको पहिलो महिनामा यहाँका खसभाषी महिलाको उपचारमा खटिँदा छोटै समयमै घुलमिल हुन सकिएको अनुभव डा.सुबीले सुनाउनुभयो ।
यो सात वर्षको अवधिमा कर्णालीका महिलाहरुलाई उपचार सेवा दिन पाउँदा निकै सन्तुष्टि मिलेको डा.दम्पतीले बताउनुभयो । नागरिकको सेवालाई पहिलो ठानेर सात महिनादेखि ढाई वर्षको छोरीलाई काठमाडौंमै छोडेर डा.दम्पति प्रतिष्ठानमा अनवरत रुपमा काम गर्दै आउनुभएको छ ।
