४ मंसिर २०८२, बिहीबार
सुर्खेतः नेपालका लागि नर्वेका राजदुत डाग्नी मिओसले उच्च शिक्षा विकासमा नेपाल–नर्वेको सहकार्य निरन्तर हुने बताउनुभएको छ ।
मध्यपश्चिम विश्वविद्यालयद्वारा आज सुर्खेत वीरेन्द्रनगरमा आयोजित ‘खुला संसद र नागरिक सहभागिता सम्बन्धी अन्तरसंवाद’ कार्यक्रममा बोल्दै राजदूत मिओसले दुई देशबीच शैक्षिक विकासमा हुने सहकार्यले थप उचाइमा प्राप्त गर्ने बताउनुभयो । उहाँले भन्नुभयो, “मध्यपश्चिम विश्वविद्यालयको समावेशी शिक्षा प्रवद्र्धनमा सहकार्य हुँदै आएको छ । आगामी दिनमा पनि स्नातक र स्नातकोत्तर तहका कार्यक्रमहरुमा सहयोगलाई निरन्तरता दिनेछौं ।”
शिक्षा क्षेत्रमा विश्वभर विश्वसनीय विकास साझेदारका रुपमा परिचित नर्वेली राजदूत मिओससहित संयुक्त राष्ट्र संघीय विकास कार्यक्रमका नेपालस्थित आवासीय प्रतिनिधि क्योको योकोसुका सम्वद्ध टोलीले सुर्खेत वीरेन्द्रनगरस्थित मध्यपश्चिम विश्वविद्यालय परिवारसँग पहिलो पटक अन्तरसंवाद गर्न पाउँदा खुशी लागेको बताएको छ ।
विश्वविद्यालयका उपकुलपति प्राडा.ध्रुवकुमार गौतमले उच्च शिक्षा विकासका लागि अनुसन्धान तथा क्षमता विकासमा नर्वेजियन कार्यक्रम (नोरहेड–दोस्रो) अन्तरगत सञ्चालित बिल्डिङ इन्क्लुसिभ एजुकेशन इन नेपाल (द्यक्ष्भ्एल्) परियोजनाबाट प्राप्त उपलब्धि र प्रभावप्रति उच्च प्रशंसा व्यक्त गर्नुभयो । ओस्लोमेट–ओस्लो मेट्रोपोलिटन विश्वविद्यालयको नेतृत्वमा इनल्यान्ड नर्वे युनिभर्सिटी अफ एप्लाइड साइन्सेज, त्रिभुवन विश्वविद्यालय र मध्यपश्चिम विश्वविद्यालयको साझेदारीमा अघि बढाइएको यो प्रमुख परियोजनाले समावेशी शिक्षा तथा विशेष शिक्षाका क्षेत्रमा शैक्षिक र संस्थागत क्षमता अभिवृद्धिमा महत्वपूर्ण योगदान गरेको उपकुलपति प्राडा.गौतमले बताउनुभयो ।
उहाँले भन्नुभयो, “यस साझेदारीले प्रमाण–आधारित शिक्षण, उच्च गुणस्तरीय अनुसन्धान र नीतिगत पैरवीमा विश्वविद्यालयको आधारलाई उल्लेखनीय रुपमा सुदृढ गरेको छ । परियोजनाले समावेशी शिक्षामा दक्ष, सक्षम र दिगो प्रभाव पार्ने जनशक्ति उत्पादन गर्ने मजबुत संरचना तयार गरेको छ ।” समावेशी र समान शिक्षा सुनिश्चित गर्न दिगो विकास लक्ष्य ४ र १० सँग मेल खाने अन्तर्राष्ट्रिय सहकार्यलाई उपकुलपति प्राडा.गौतमले उत्कृष्ट नमुनाका रुपमा प्रस्तुत गर्नुभयो ।
मध्यपश्चिम विश्वविद्यालयले २०२६ मा अन्तर्राष्ट्रिय समावेशी शिक्षा सम्मेलन आयोजना गर्ने तयारीका साथै नर्वेजियन साझेदारहरूसँग संयुक्त परियोजना तथा शैक्षिक आदान–प्रदानका नयाँ सम्भावनाहरु खोज्न इच्छुक रहेको उहाँको भनाई थियो । उपकुलपति प्राडा.गौतमले नेपाल र नर्वेबीचको सम्बन्ध मित्रता एवं सहयोगपूर्ण र परस्पर सम्मानमा आधारित भएको बताउँदै मानव विकास सूचकांकका हिसाबले निकै पछि परेको कर्णालीको उच्च शिक्षा विकासमा मध्यपश्चिम विश्वविद्यालयले नेतृत्वदायी भूमिका खेलेको जनाउनुभयो ।
सन् १९७३ मा दुई मुलुकबीच औपचारिक रुपमा कूटनीतिक सम्बन्ध स्थापना भएयता नर्वे नेपालका लागि शिक्षा, मानव अधिकार, ऊर्जा तथा वातावरण संरक्षणका क्षेत्रमा सहकार्य गर्दै आएको एक विश्वासिलो विकास साझेदार देश भएकाले पनि नर्वेली राजदूत म्योसले विश्वविद्यालयसँग गरेको अन्तरसंवादलाई अर्थपूर्ण रुपमा लिएको नोरहेड–दोस्रो परियोजना संयोजक एवं मध्यपाश्चिम विश्वविद्यालय योजना, विकास तथा अनुगमन निर्देशनालयका कार्यकारी निर्देशक डा.विष्णुकुमार खड्का जानकारी दिनुभयो ।
उक्त अन्तरसंवाद कार्यक्रममा विश्वविद्यालयका रजिष्ट्रार प्राडा.शोभाखर कँडेल, अन्तरराष्ट्रिय सम्बन्ध निर्देशनालयका कार्यकारी निर्देशक डा.यदुप्रसाद ज्ञवालीले विश्वविद्यालयको संक्षिप्त जानकारी, यसले सञ्चालन गर्दै आएका कार्यक्रम तथा शैक्षिक उपलब्धिका बारेमा आफ्नो प्रस्तुति राख्नुभएको थियो ।
