१४ बैशाख २०८०, बिहीबार
नेपाल स्वास्थ्य व्यवसायी परिषद्ले जनस्वास्थ्य विषयमा लिएको लाईसेन्स परीक्षामा कर्णाली स्वास्थ्य विज्ञान प्रतिष्ठान जुम्लाले शतप्रतिशत सफल नतिजा प्राप्त गरेको छ ।
परिषद्ले यही बैशाख १३ गते लिएको ब्याच्लर ईन पब्लिक हेल्थ (बिपिएच) विषयको छैटौं नाम दर्ता (लाईसेन्स) परीक्षामा प्रतिष्ठान जुम्लामा जनस्वास्थ्य विषयमा अध्ययनरत शतप्रतिशत परीक्षार्थी सफल भएका हुन् । देशभरिबाट तीन सय ३२ जना परीक्षार्थीहरु लाईसेन्स परीक्षामा सामेल भएपनि कुल एक सय ८० जना (५४.२२ प्रतिशत) मात्र पास भएका छन् ।
उक्त परीक्षामा एक सय ५२ जना फेल भएको व्यवसायी परिषद्अन्तरगतको परीक्षा समितिले सूचना प्रकाशन गरी जानकारी दिएको छ । कर्णाली स्वास्थ्य विज्ञान प्रतिष्ठानबाट सहभागी १७ परीक्षार्थी दिएकको उक्त परीक्षामा सबै सफल भएको प्रतिष्ठानका उपकुलपति डा.मंगल रावलले जानकारी दिनुभयो । प्रतिष्ठानबाट उत्पादित जनशक्ति मुलुकमै अब्बल रहेको दावी उहाँले गर्नुभयो ।
“हामी दावाका साथ भन्न सक्छौं कि मुलुकको राम्रो मध्येको जनशक्ति हाम्रो पनि छ,” उपकुलपति डा.रावलले भन्नुभयो, “प्रतिष्ठानले शिक्षामा कायम गरेको गुणस्तरले सक्षम जनशक्ति उत्पादन गरिरहेको छ ।” अहिले ब्याच्लर ईन नर्सिङ (बिएन)को अध्ययन अध्यापन कार्य सुरु गरिएको उहाँले बताउनुभयो ।
प्रतिष्ठान जुम्ला स्कुल अफ पब्लिक हेल्थका डीन प्राडा.मनिराज क्षेत्रीले अध्यापन र अध्ययनमा शिक्षक एवं विद्यार्थी दुवैको लगाव हुनुले राम्रो नतिजा आएको बताउनुभयो । डीन पहाडीले भन्नुभयो, “उत्कृष्ट कार्य गर्न भौगोलिक विकटता र दूरीले फरक पार्दैन । त्यसका लागि जो कोहीसँग इच्छाशक्ति र दृढ संकल्प हुनुपर्दछ । यसमा व्यवस्थापन, राजनीतिक तह, शिक्षक, विद्यार्थी, प्रेस जगत सबैको उत्तिकै हात छ ।”
परीक्षार्थी सृजना महतले प्रतिष्ठान व्यवस्थापन र शिक्षकहरुको भूमिकाले आफूहरु सफल भएको बताउनुभयो । दुर्गम भनेर हेपिएको कर्णालीमा अहिलेको नतिजाले अध्ययनका लागि कर्णाली जानुपर्छ भन्ने राम्रो सन्देश दिएको र चाहाना भएकाहरुलाई पनि कर्णाली अध्ययन गर्न जानुपर्छ भन्ने बलियो विश्वास जगाएको उहाँको भनाई थियो ।
परिषद्ले देशैभर चिकित्सा एवं स्वास्थ्य क्षेत्रमा स्नातक तह उत्तीर्ण गरेका विभिन्न विषयमा आठ सय ५० जनाको नाम दर्ता (लाईसेन्स) परीक्षा लिएको थियो । जसमा तीन सय ६८ (४३.२९ प्रतिशत) परीक्षार्थी उत्तीर्ण तथा चार सय ८२ परीक्षार्थी अनुत्तीर्ण भएका नतिजा प्रकाशन गरिएको थियो । त्यस्तै, स्नातकोत्तरतर्फ नौ सय ३७ परीक्षार्थी लाईसेन्सको परीक्षामा सामेल भएकोमा तीन सय ९६ (४२.२६ प्रतिशत) परीक्षार्थी पास भएको जनाइएको छ ।
चिकित्सकीय सेवा, शिक्षा र अनुसन्धानमूलक कार्यहरुहरुमा बढोत्तरी हुँदै गएपछि र प्रतिष्ठानबाट उत्पादित जनशक्तिको नतिजा राम्रो हुँदै जाँदा पछिल्लो समय भौगोलिक विकटता र दुर्गमता असफलता मानक होइनन् र उत्कृष्टता हाँसिल गर्ने बाधक हुन सक्दैनन् भन्ने यसले गतिलो सन्देश दिएको छ । जसका कारण शिक्षा लिन र सेवा गर्न आउने दुवै खाले जनशक्तिका लागि कर्णाली स्वास्थ्य विज्ञान प्रतिष्ठान आकर्षणको थलोमा रुपान्तरित भएको छ ।
