२७ जेठ २०७८, बिहीबार
अमेरिकाले चीनलाई प्रमुख खतरा मान्दै अमेरिकी सिनेटले पारित गरेको विधेयकको चीनले कडारूपमा विरोध गरिरहेका बेला अमेरिकी उपरक्षामन्त्रीले चीनलाई रोक्न ७ खर्ब १५ अर्ब बराबरको बजेट भएको जनाएकी छिन् ।
अमेरिकी सेनाले चीनलाई पहिलो चुनौतीको रूपमा व्याख्या गरेर भविष्यमा हुने भिडन्तको तयारी गरिरहेको छ ।
रक्षामन्त्री लोयड अस्टिनले अमेरिकी सेनाको निर्देशिका बुधबार जारी गरेका थिए ।
रक्षामन्त्रालय पेन्टागनको एक छुट्टै विज्ञप्तिमा चीनलाई एक नम्बरको चुनौतीको रूपमा आएको उल्लेख गरिएको छ ।
निर्देशिकामा अमेरिकाका सहयोगी र साझेदारहरूलाई अमेरिकामा लगानी गर्न आह्वान गरिएको छ ।
बुधबार रक्षामन्त्रीले निर्देशिका जारी गर्न अघि राष्ट्रपति जो बाइडनले चीनलाई प्रमुख चिन्ताको कारण भनेका थिए । बाइडनले ट्रम्पकै जस्तै बोलेका थिए । मार्चमा बाइडनले क्वाडको पहिलो बैठकमा सहभागी भएका थिए । अमेरिका, अस्ट्रेलिया, जापान र भारत रहेको क्वाडलाई एसियन नेटो भनी प्रचारमा ल्याइयो । यो क्वाडलाई इन्डो प्यासिफिक क्षेत्रमा चीनलाई टक्कर दिने गरी अगाडि बढाइएको छ ।
अमेरिकाका उप रक्षामन्त्री क्याथलिन हिक्सले सन् २०२२का लागि चीनसँग भिडन्त गर्न ७ खर्ब १५ अर्ब बजेटको माग गरिएको बताएकी छिन् ।
उनको यो टिप्पणी अमेरिकाको इन्डो प्यासिफिक कमान्डले आगामी पाँच वर्षका लागि २७ अर्ब अमेरिकी डलर बराबरको बजेट आग्रह गरेका बेला सार्वजनिक भएको छ । चीनको पूवी सामुद्रिक किनारामा क्षेप्यास्त्रको लाम तयार पार्न रक्षा बजेट माग गरिएको हो ।
बाइडनले ट्रम्पको नीति परित्याग गरिरहेको भनिरहेका बेला उपरक्षामन्त्री हिक्सले सन् २०१८मा ट्रम्पको राष्ट्रिय रक्षा रणनीतिको धागोलाई निरन्तरता दिने बताएकी छिन् । ट्रम्पको यो नीतिमा जोड दिनुको कारण चीन र रुससँगको ठूलो शक्ति प्रतिस्पर्धा गर्न खोजिनु भएको उनको भनाइ छ । झिल्को डटकम
