२७, बैशाख २०७८, सोमबार
जिल्ला प्रहरी कार्यालय सुर्खेतले पछिल्लो समयमा चोरीका घटनामा ७५ प्रतिशत कमी आएको बताएको छ ।
अपराध नियन्त्रण कार्य योजना बनाउनुपूर्व कार्तिक मंसिर र पुस महिनामा ३६ चोरीका घटना व्यहोरेको प्रहरीले कार्य योजना बनाएर कार्यान्वयनमा गएपछि माघ, फागुन र चैतमा नौ वटामा झारेको जिल्ला प्रहरी कार्यालय सुर्खेतका सूचना अधिकारी एवं प्रहरी नायब उपरीक्षक रामप्रसाद घर्तीले जानकारी दिनुभयो ।
“कार्तिक, मंसिर र पुसमा ३६ चोरीका घटना घटेका थिए,” प्रहरी नायब उपरीक्षक घर्तीले भन्नुभयो, “कार्य योजना बनाएर कार्यान्वयनमा गएपछि चोरीका घटना माघ, फागुन र चैतमा नौ वटामा झारिएको छ ।” कार्य योजनाको प्रभावकारी कार्यान्वयनले चोरी घटनामा ७५ प्रतिशत कमी ल्याएको उहाँले बताउनुभयो । उहाँले दोस्रो चरणको लकडाउन कार्यान्वयन भएसँगै वीरेन्द्रनगरका घर तथा पसलहरु बन्द गरी धनीहरु आ–आफ्नो नीजि निवासतिर गएकोले चोरीका घट्नाहरु बढेको पाईएको भन्दै सुर्खेतवासीलाई आफ्नो महत्वपूर्ण मूल्यवान गरगहना र सम्पति सुरक्षामा राख्न आग्रह गरिएको प्रहरी नायब उपरीक्षक घर्तीले जनाउनुभयो ।
यता प्रहरी निरीक्षक कनक शाहीले कार्यजना निर्माण गरी त्यसलाई कार्यान्वयन गर्ने क्रममा चोरीका घटना ह्वात्तै घटेको जनाउनुभयो । उहाँले कार्ययोजना कार्यान्वयनको चरणमा भए गरेका सुरक्षा र अनुसन्धान क्रियाकलाप अन्तरगत सादा पोशाकमा अनुगमन निरीक्षण गर्दा ३५ जना जनशक्ति परिचालन गरिएको जनाउनुभयो ।
प्रहरी निरीक्षक शाहीका अनुसार रातको समयमा शंकास्पद तरिकाले हिडडुल गरिरहेको ७९ जना व्यक्तिहरुलाई सोधपुछ गरिएको र त्यस मध्ये १२ जनालाई दसी प्रमाणका आधारमा सामानसहित चोरी महलअन्तरगत मुद्दा चलाईएको छ । चोरीएका विभिन्न मोबाईल, ल्याबटप,साईकल र अन्य महत्वपूर्ण सामाग्रीहरु फेला पारी सम्बन्धित २० जना व्यक्तिको जिम्मा लगाईएको प्रहरीले जनाएको छ ।
त्यस्तै, जिल्ला प्रहरी कार्यालय सुर्खेतले बैशाख महिनाको तीन सातामा लागु औषधका सातवटा घटना घटना दर्ता गरेको छ । जसमा प्रहरीले लागु औषध ब्राउन सुगरसहित ११ जना अभियुक्तलाई पक्राउ गरेको छ ।
नयाँ भेरियन्टसहितको दोस्रो लहरको कोरोना संक्रमणको प्रतिकार्य, रोकथाम तथा नियन्त्रणका लागि जारी गरिएको निषेधाज्ञामा समेत खटिएको सुर्खेत प्रहरीले १३.५ ग्राम लागु औषधसहित ११ जनालाई पक्राउ गरेको हो । लागु औषधमा संलग्न पाँचजना भने फरार रहेको सूचना अधिकारी एवं प्रहरी नायब उपरीक्षक घर्तीले जनाउनुभयो ।
पक्राउ पर्नेहरुमा सुर्खेतका एक महिलासहित आठ, दैलेखको दुई पुरुष र कालीकोटको एक महिला रहेको प्रहरी नायब उपरीक्षक घर्तीले बताउनुभयो । उहाँका अनुसार लागु औषधका पाँचजना अभियुक्तको खोजी कार्य भईरहेको र पक्राउ परेकाहरुको अनुसन्धान थालिएको छ ।
