१२ साउन २०८३, मंगलबार
सुर्खेतः नेपाली कम्युनिष्ट पार्टी (नेकपा) कर्णाली प्रदेशसभा दल नेता मंगलबहादुर शाहीले कर्णाली प्रदेशको मुख्यमन्त्री पदमा दावी पेश गर्नुभएको छ ।
नेकपा एमालेको समर्थतनमा आज कर्णाली प्रदेश प्रमुखको कार्यालय सुर्खेतमा पुगेर नेता शाहीले मुख्यमन्त्री पदमा दावी पेश गर्नुभएको हो । नेता शाहीले आज दावी पेश गरेपनि प्रदेश प्रमुख यज्ञराज जोशीले उहाँलाई बैठकको छलफलपछि भोलि नियुक्ति दिनुहुने प्रदेश प्रमुखको कार्यालय सुर्खेतका सूचना अधिकारी मनमाया काउचाले जानकारी दिनुभयो ।
उहाँका अनुसार उक्त दावी पेश गर्ने कार्यक्रममा नेकपा एमालेका प्रमुख सचेतक टेकराज पछाई उपस्थित हुनुभएको थियो । नेकपा एमाले र नेपाली कम्युनिष्ट पार्टी (नेकपा)बीच साउन ९ गते सत्ता समीकरणका लागि राष्ट्रिय सहमति भएसँगै कर्णाली सरकारको नेतृत्व गर्ने जिम्मा नेकपालाई परेको थियो । हाल कर्णाली प्रदेशसभाका ४० प्रदेशसभा सदस्य मध्ये १४ नेपाली कम्युनिष्ट पार्टी (नेकपा) र १० नेकपा एमालेका प्रदेशसभा सदस्य रहेका छन् ।
