१२ फागुन २०८१, सोमबार
सर्वोच्च अदालतका न्यायधीश तथा केन्द्रीय न्याय क्षेत्र समन्वय समितिका सदस्य शारङ्गा सुवेदीले नागरिकलाई न्यायको अनुभूति दिलाउने गरी काम गर्नु राज्यको दायित्व भएको बताउनुभएको छ ।
उच्च अदालत सुर्खेतमा सञ्चालित जिल्ला तथा उच्च अदालत न्याय क्षेत्र समन्वय समितिको काम कारवाहीको प्रभावकारितामाः केन्द्रीय न्याय क्षेत्र समन्वय समितिको भूमिका विषयक एक दिवसीय अन्तरक्रिया कार्यक्रममा उहाँले न्याय ढिलो दिनु भनेको न्याय नदिनु जस्तै भएको बताउनुभयो । राज्यका सेवा प्रदायक निकायहरु एक अर्काको काम गर्ने तवर तरिकाले नागरिकहरुमा कस्तो प्रभाव परेको छ भन्नेबारे छलफल गर्ने उद्देश्यले अन्तरक्रिया कार्यक्रम गरेको उहाँको भनाई थियो ।
न्यायधीश सुवेदीले भन्नुभयो, “गलत हामी सबैका छन् । न्याय क्षेत्र समन्वय समितिमा बसेर त्यहाँ भएका कमिकमजोरीहरुको सुक्ष्म अध्ययन गरौं र सुधार कसरी गर्न सकिन्छ त्यो पनि हेरौं अनि समस्याको समाधान निस्कि हाल्छ नी । अपराध अनुसन्धान, अभियोजन गर्ने कुरामा सम्बन्धित क्षेत्र संवेदनशील हुनुपर्दछ ।”
अन्त्यमा फैसला गर्ने काम अदालतको भएपनि त्यसको अनुसन्धान, अभियोजन गर्ने निकायहरुले सत्य तथ्यमा आधारित भएर प्रमाण जुटाउनुपर्ने भन्दै न्यायधीश सुवेदीले राज्यका प्रतिनिधिहरुले मान्छेलाई थुनामा राख्दा त्यसको औचित्यता प्रष्ट गर्नुपर्ने बताउनुभयो । आरोप लाग्ने बित्तिकै आत्मसम्मान गुम्ने र उनीहरुको अधिकारको ख्याल नगर्ने गरी काम गर्न नहुनेमा उहाँको जोड थियो ।
उच्च अदालत न्याय क्षेत्र समन्वय समितिका अध्यक्ष तथा उच्च अदालत सुर्खेतका कायममुकायम न्यायधीश कृष्णलाल भट्टराईले फौजदारी अपराधसँग सम्बन्धित घटनामा निष्पक्ष अनुसन्धान हुनपर्ने बताउनुभयो । सर्वसाधारणलाई न्यायमा पहुँच हुने गरी राज्यले काम गर्नुपर्ने भन्दै उहाँले लगत फछ्र्यौैट समितिलाई सक्रिय बनाउनुपर्नेमा जोड दिनुभयो । न्याय सम्पादनमा भने न्यायिक निकायहरुले नागरिकमैत्री भूमिका निर्वाह गर्नुपर्नेमा उहाँको सुझाव थियो ।
जिल्ला अदालत सुर्खेतका न्यायधीश दिपक ढकालले न्यायिक कार्य सम्पादन गर्नेहरुले निर्णय मात्र नदिई न्याय दिने काम गर्न आग्रह गर्नुभयो । फैसला कार्यान्वयन अदालतको काम मात्र नभई राज्यका तोकिएका संयन्त्रहरुले प्रभावकारी रुपमा गर्नुपर्ने जुनाउनुभयो । आफूहरु भने न्यायिक श्रीवृद्धिका लागि अगाडि बढेको न्यायधीश ढकालको भनाई थियो ।
वीरेन्द्रनगर नगरपालिकाका प्रमुख मोहनमाया ढकालले ढिलो न्यायले नागरिक मात्र नभई सरकार पनि अन्याय पर्ने धारणा व्यक्त गर्नुभयो । उहाँले न्यायिक निरुपण समयमै हुन सकेमात्र नागरिकहरुलाई न्यायको अनुभूति हुने बताउनुभयो । उक्त कार्यक्रममा मालपोत तथा नापी कार्यालयका प्रमुख, सरकारी वकिल, अधिवक्तालगायतका कानून व्यवसायहरुको सहभागिता रहेको थियो । शुरबहादुर सिंह
