OnlinePana

आज : २०८१ बैशाख १ गतेPreeti to UnicodeUnicode to PreetiRoman to UnicodeDate Converter
कोरपाटी संवाददाताफागुन २३, २०८०सुर्खेत
१०९ पटक

२३ फागुन २०८०, बुधबार

कर्णाली प्रदेश सरकारले जाजरकोट भूकम्पबाट प्रभावित क्षेत्रमा दक्ष डकर्मी तयार गर्ने भएको छ ।

वातावरण अनुकुल भौतिक संरचना निर्माण, आवश्यक नीति एवं विधि पालना गरी विपद्बाट हुने क्षति न्यूनीकरण तथा समुदायमा ज्ञान, सीप र प्रविधिसहितको दक्ष जनशक्ति तयार गर्ने प्रदेश सरकारले भूकम्प प्रतिरोधी भवन तथा संरचना निर्माण सम्बन्धी तालिम सञ्चालन गर्ने भएको हो । त्यसका लागि त्रिपक्षीय सम्झौता भएको छ ।

कर्णाली प्रदेश प्रशिक्षण प्रतिष्ठान, भूकम्प प्रविधि राष्ट्रिय समाज नेपाल र स्थानीय तहबीच तालिम सञ्चालन गर्ने गरी बुधबार सम्झौता पत्रमा हस्ताक्षर गरिएको हो । सम्झौता पत्रमा हस्ताक्षर कार्यक्रममा बोल्दै कर्णाली प्रदेशका मुख्यमन्त्री राजकुमार शर्माले जाजरकोट भूकम्पलाई अवसरका रुपमा उपयोग गरी अगाडि बढ्ने बताउनुभयो ।

उहाँले भन्नुभयो, “भ्ूाकम्पले दिएको शिक्षालाई जीवन व्यवहारमा लागु गरेर जानुको विकल्प छैन । गोरखा बारपाकको भूकम्पबाट शिक्षा लिन सकेको भए जाजरकोट भूकम्पबाट हामीले यति ठूलो क्षति व्यहोर्नु पर्दैनथ्यो ।” भूकम्पपश्चात खोज उद्धार र राहतमा सरकारले लिएको पहलकदमी उल्लेख्य भएपनि पुनःनिर्माणको कार्यमा ढिलाई भएको मुख्यमन्त्री शर्माले बताउनुभयो ।

भूकम्प प्रभावित जिल्ला जाजरकोट छेडागाड नगरपालिका, बारेकोट गाउँपालिका, रुकुमपश्चिम चौरजहारी नगरपालिका, त्रिवेणी गाउँपालिका र सल्यानको दार्मा गाउँपालिका गरी पाँच स्थानीय तहमा भूकम्प प्रतिरोधी भवन तथा संरचना निर्माण लागि जनप्रतिनिधि, कर्मचारी र डकर्मीको तालिम सञ्चालन गर्ने गरी सम्झौता भएको छ ।

छेडागाड र चौरजहारी नगरपालिका, बारेकोट, त्रिवेणी र दार्मा गाउँपालिका प्रत्येक स्थानीय तहबाट बाह्र जनाका दरले डकर्मीको लागि कार्यगत तालिम सञ्चालन गर्न लागिएको कर्णाली प्रदेश प्रशिक्षण प्रतिष्ठानका निर्देशक विष्णुप्रसाद कोईरालले जानकारी दिनुभयो । उहाँका अनुसार भूकम्प प्रतिरोधी भवन निर्माणको डकर्मीलाई कार्यगत तालिम दिईनेछ । डकर्मीलाई दिईने तालिम २० दिनको हुनेछ ।

प्रभावित जिल्ला जाजरकोट, रुकुमपश्चिम, र सल्यानका सबै स्थानीय तहका जनप्रतिनिधिहरुलाई भवन पुनःनिर्माणको विधि, भूकम्प प्रतिरोधी डिजाईनका सिद्धान्त र प्रतिरोधी अभ्यासको क्षमता विकास सम्बन्धी सीप निर्देशक कोईरालाले बताउनुभयो । तालिम सञ्चालनको लागि रु.एक करोड ४६ लाख खर्च हुने जनाइएको छ ।

तालिमबाट ६० जना दक्ष डकर्मी तयार हुनेछन् । भूकम्प प्रतिरोधी भवन निर्माणसंहिता रहेर निर्माण कार्य गर्नेमा समेत कार्यक्रमबाट सहयोग मिल्ने भूकम्प प्रविधि र राष्ट्रिय समाज नेपालका कार्यकारी निर्देशक सूर्यनारायण श्रेष्ठले जानकारी दिनुभयो । तीन तहका सरकारबीच आपसी सहकार्य र जनसमुदायको सक्रिय सहभागिताले आगामी दिनमा विपद्सँग सामना गर्न सकिने जनाइएको छ ।

प्रतिकृया दिनुहोस्