१८ फागुन २०८०, शुक्रबार
कर्णाली प्रदेशका मुख्यमन्त्री राजकुमार शर्माले प्रविधिको विकासबाट मात्र कर्णालीलाई माथि उठाउन सकिने बताउनुभएको छ ।
कर्णाली प्रदेश सरकार आन्तरिक मामिला तथा कानून मन्त्रालय र आईसिटी फाउण्डेसन नेपालको संयुक्त आयोजनामा आजबाट सुर्खेतको वीरेन्द्रनगरमा सुरु भएको दुईदिने ‘डिजिटल कर्णाली कन्क्लेभको आज शुभारम्भ गर्दै उहाँले कर्णालीको समग्र विकासलाई प्रविधिसँग जोडेर अगाडि बढ्ने बताउनुभयो ।
उहाले भन्नुभयो ‘कर्णालीको भूबनोट, यहाँको विकास आदिलाई ध्यान दिएर प्रविधिको विकास नगरी अहिलेको आवश्यकता पुरा गर्न कठिन छ । यसको उन्नति र प्रगतिका लागि प्रविधिको भरपुर उपयोग गर्नुपर्ने देखिन्छ ।’ कर्णालीमा हुने विकासलाई प्रविधिसँग जोड्नुपर्ने चुनौति रहेपनि युगको आवश्यकतालाई बोध गरी कन्क्लेभ आयोजना गरिएको उहाँको भनाई थियो ।
प्रविधिको सहायताबाट आउँदो दश वर्षमा हरेक क्षेत्रबाट कर्णालीलाई हेर्न लायक बनाउने शर्माले बताउनुभयो । आन्तरिक मामिलामन्त्री कृष्णबहादुर जिसीले डिजिटल मार्गचित्र तयार गर्न कन्क्लेभको आयोजना गरिएको बताउनुभयो । उहाँले कर्णाली प्रदेशकै एक महत्वपूर्ण मानिएको यो कार्यक्रमले नीति, नियम, सञ्चार, कृषि, पर्यटन, शिक्षा, स्वास्थ्य, जलविद्युत, सुशासन, विपद् व्यवस्थापन, अर्थतन्त्र, नेतृत्व, स्टार्टअप र उद्यमीका विषयमा नीतिगत छलफल आजबाट सुरु भएको जनाउनुभयो ।
आइसिटी फाउण्डेसन नेपालका अध्यक्ष राजन लम्सालले डिजिटल नीति र नेतृत्व, मानव पूँजी, आईसिटी र तथ्याङ्क उद्योग, डिजिटल पूर्वाधार, डिजिटल रुपान्तरण र सुरक्षाको विकास र सुनिश्चितताका लागि प्रविधि सम्मेलन गर्न थालिएको बताउनुभयो । उहाँका अनुसार कन्क्लेभमा चार वटा प्रमुख नोट र छ वटा प्यानल सत्रहरु सञ्चालन हुनेछन् ।
