२८ माघ २०८०, आइतबार
कर्णाली प्रदेश सरकारका मुख्यमन्त्री राजकुमार शर्माले व्यवस्था बदलिएसँगै सिंहदरबारको पर्खालभित्र हुने काम गाउँमा पुगेको बताउनुभएको छ ।
मूलधार महिला सेवा केन्द्र (मासबेस उदयपुर)द्वारा शनिबार वीरेन्द्रनगर सुर्खेतमा आयोजित ‘छैटौं ऐतिहासिक राष्ट्रिय बेटी सम्मेलन’लाई सम्बोधन गर्दै मुख्यमन्त्री शर्माले केन्द्रले राष्ट्रियस्तरको बेटी सम्मेलन कर्णालीमा गर्नुले महिला आन्दोलनमा सहयोग पुग्ने बताउनुभयो । “हिजोको आन्दोलनमा महिलाहरुको भूमिका धेरै रहेको थियो,” उहाँले भन्नुभयो, “अब आम जनतामा जागरण पैदा गर्न आवश्यक छ जहाँ महिलाहरुले पनि विभिन्न आन्दोलनको नेतृत्व गरिरहेका छन् ।”
दश वर्षे सशस्त्र संघर्ष र विसं.२०६१÷०६२ को जनआन्दोलनपछि मुलुकमा ठूलो परिवर्तन आएको बताउँदै मुख्यमन्त्री शर्माले उत्पीडित जाति, वर्ग र धर्मका मान्छेहरुले मुक्ति नपाउँदासम्म आन्दोलन जारी रहने यसका लागि आफूले पनि सक्दो सहयोग गर्ने जनाउनुभयो । संघर्ष, त्याग र बलिदानभित्र संघर्ष लुकेको जनाउँदै आर्थिक, सामाजिक, साँस्कृतिक परिवेश अनुसार परिवर्तन खोज्नुपर्ने र त्यसका लागि उत्पीडितहरु एक हुुनुपर्ने उहाँको भनाई थियो ।
केन्द्रका अध्यक्ष नजबुल खानले नेपालका विभिन्न प्रदेश गरी पाँचौ र अहिले कर्णालीमा छैटौं बेटी सम्मेलन गरिएको बताउनुभयो । बेटीहरुको सामाजिक, साँस्कृतिक अवस्थाबारे राज्यलाई सहजै बुझाउन र उनीहरुको अधिकार सुनिश्चत गराउन सम्मेलन थालिएको जनाउनुभयो ।
उपप्रध्यापक डा.लक्ष्मी जोशीले राष्ट्रियस्तरको बेटी सम्मेलनले अहिलेसम्म जकडिएको पितृसतात्मक सोचलाई चिर्नु आवश्यक रहेको टिप्पणी गर्नुभयो । बेटीहरुमा आएका समस्याहरुको दीर्घकालीन सम्बोधन गर्न कार्यक्रम अभियानका रुपमा अगाडि बढाउन उहाँले सुझाउनुभयो । सम्मेलनमा कर्णाली प्रदेशका दशै जिल्लाबाट प्रतिनिधिमूलक सहभागिता रहेको थियो ।
