१४ माघ २०८०, आइतबार
नेकपा एमाले कर्णाली प्रदेशसभा दलका नेता यामलाल कँडेलले प्रदेश सरकारको प्रगति निराशाजनक भएको बताउनुभएको छ ।
आज यहाँ आयोजित पत्रकार भेटघाटमार्फत नेता कँडेलले माघ १२ गते बसेको एमाले कर्णाली प्रदेशसभा दलको बैठकका निर्णय सार्वजनिक गर्दै कर्णाली सरकारको विगत एक वर्षको अवधिलाई नियाल्दा कार्य प्रगति निराशाजनक र बेरुजु उच्च रहेको टिप्पणी गर्नुभयो । विकासप्रति जनताको तीव्र आकांक्षा, यहाँको विकट भौगोलिक अवस्था, सरकारको विकास नीति तथा गतिबीच तालमेल हुन नसक्दा आमजनतामा निराशा छाएको उहाँको आरोप थियो ।
प्रदेश सरकारको गलत कामकारवाहीले गर्दा जनप्रतिनिधि र व्यवस्थाप्रति प्रश्न उठ्ने स्थिति पैदा भएको उहाँको भनाई थियो । नेता कँडेलले भन्नुभयो, “यतिछिटै कमजोर परिस्थितिको निर्माण हुनु आफैमा दुःखद् हो तरपनि सरकार सुधार गर्नेभन्दा थप गलत कार्यहरुलाई प्रश्रय दिनमा बढी अग्रसर देखिन्छ । योजना निर्माणमा हुने भ्रष्टाचार, अपारदर्शिता, कमिसनको जालो सरकार उद्दत छैन ।”
गत कात्तिक १७ गते जाजरकोटमा गएको विनासकारी भूकम्पले रुकुमपश्चिम र सल्यानमासमेत क्षति पुर्याउँदा पीडितहरुको राहत तथा पुनःस्थापना सरकारले गर्न नसकेको जिकिर गर्दै उहाँले प्रमुख प्रतिपक्षी दलको हैसियतले सरकारलाई नीतिगत सुधार, सुशासन, पारदर्शिता, विकास र कर्णालीको समृद्धिको सवालमा पटकपटक घच्घच्याउने गरेपनि नसुनेको गुनासो गर्नुभयो । आमजनताको आकांक्षा बुझ्ने कार्यप्रति अनुत्तरदायी रहेकोले गठबन्धन सरकार आफै असफलतातर्फ गएको नेता कँडेलको भनाई थियो ।
