१७ पुस २०८०, मंगलबार
नेकपा (माओवादी केन्द्र) सल्यानको ‘जनतासँग माओवादी विशेष रुपान्तरण अभियान’ विशेषाङ्क पार्टीको मुखपत्र ‘सल्यान संकल्प’ विमोचनसहित रुपान्तरण अभियान सम्पन्न भएको छ ।
नेकपा (माओवादी) केन्द्रका सल्यान ईञ्चार्ज नरेश भण्डारीको अध्यक्षता तथा पार्टी स्थायी कमिटि सदस्य कालीबहादुर मल्लाको प्रमुख आतिथ्यतामा अभियान सम्पन्न भएको छ । अभियानको समापन कार्यक्रमलाई सम्बोधन गर्दै स्थायी कमिटि सदस्य मल्लले माओवादीको तीन महिने रुपान्तरण अभियानले कार्यकर्ता तथा जनतामा निकै ठूलो उभार ल्याएको टिप्पणी गर्नुभयो । जनताको बलमा नेपालको संघीय लोकतान्त्रि गणतन्त्रात्मक व्यवस्था आईपुगेको र यसको रक्षा एवं संस्थागत गर्न पनि जनताकै सहयोग आवश्यक रहेको उहाँको भनाई थियो ।
स्थायी कमिटि सदस्य मल्लले भन्नुभयाे ‘अभियान उत्साहजनक र व्यवस्थित तवरबाट सम्पन्न भयाे । यसले संगठनलाई गतिशील एवं क्रियाशील बनाउँदै लगेकाे छ र जनताका समस्यासँग माओवादी पार्टीलाई प्रत्यक्ष साक्षात्कार गर्ने तथा आफूलाई समेत रुपान्तरण गर्ने विशेष अवसर प्रदान गरेकाे छ ।’ त्यस्तै जनवर्गीय संगठन र पार्टीमा सतहमा आएका अन्तरविराेधहरुलाई हल गर्न पनि अभियानबाट मद्दत पुगेकाे उहाँकाे तर्क थियाे ।
नेकपा माओवादी केन्द्रका केन्द्रीय सदस्य तथा सल्यान जिल्ला ईञ्चार्ज नरेश भण्डारीले जनताका तागतका अगाडि शासकहरुको दम नचल्ने ठोकुवा गर्नुभयो । “नेपालको संविधान, संघीयता, समानुपातिक, समावेशी, धर्मनिरपेक्षता कोही शासकहरुले दया मानेर दिएका होइन,” उहाँले भन्नुभयो, “यो जनताले शासकहरुलाई घुँडा टेकाएर ल्याएको व्यवस्था हो । उनीहरुमाथि कसैले धोका दिन मिल्दैन । धोक दिनेहरुले जनताका अगाडि त्यही नियति भोग्नुपर्दछ ।”
ईञ्चार्ज भण्डारीले सल्यान समृद्धिको चाबी तथा शुद्धताको प्रतीक कुपिण्डे दहबाट अभियान टोलीको तर्फबाट जिल्ला पार्टीलाई लाल चाबी र झण्डा हस्तान्तरण गर्दै अभियानलाई यस ठाउँमा ल्याइपुर्याउन सहयोग गर्ने सल्यानी जनता, नेतृत्वदेखि सल्यानी समग्र कार्यकर्ताहरुप्रति हार्दिक अभार व्यक्त गर्नुभयो ।
केन्द्रका कर्णाली प्रदेश अध्यक्ष बिमला केसीले रुपान्तरण अभियान आजको व्यवस्थाका उपज जनतासँग निकटतम् सम्बन्ध कायम राख्न र माओवादी नेपाली जनताको मुक्ति र स्वतन्त्रताको संस्थापक र रक्षक दुवै हो भन्ने बुझाउन सञ्चालन गरिएको विशेष कार्यक्रम भएको बताउनुभयो । रुपान्तरण अभियानले माओवादी कमजोर हुँदा निराश भएका जनतामा आशा पैदा गर्न र शहीद, बेपत्ता र घाईते परिवारका समस्या बुझ्न अभियानले ठूलो सहयोग पुर्याएको उहाँले जनाउनुभयो ।
. उक्त समापन कार्यक्रममा अभियान विशेषाङ्क पार्टीको मुखपत्र ‘सल्यान संकल्प’को बिमोचन, जिल्ला अभियान टोलीका सदस्यहरुलाई सम्मान, अभियानमा सक्रिय र उत्कृष्ट कार्य सम्पादन गर्नेहरुलाई सम्मान, जिल्ला इन्चार्जलगायतका अभियान्ताहरुको विदाई तथा समसामयिक प्रस्तावसहितको कुपिण्डे घोषणापत्र सार्वजनिक गरिएको थियो ।
