१८ मंसिर २०८०, सोमबार
नेकपा एमालेका महासचिव शंकर पोखरेलले विश्वविद्यालयहरु राजीतिक चेतना नहुँदा बिग्रेको बताउनुभयो ।
‘मध्यपश्चिम विश्वविद्यालयका विद्यार्थीसँग शंकर पोखरेल’ विषयक आज आयोजित अन्तरक्रिया कार्यक्रममा उहाँले यस्तो बताउनुभएको हो । उहाँले खराव आचरण र गलत उद्देश्य बोकेकाहरुले विश्वविद्यालयको शैक्षिक वातावरण बिगार्ने गरेको आरोप लगाउनुभयो । महासचिव पोखरेलले भन्नुभयो, “विश्वविद्यालयले योजनाबमोजिम शैक्षिक जनशक्ति निर्माण गर्न सकेका छैनन् । यसमा देशले फाइदा लिन नसकेकोले सम्वद्ध पक्षले यसतर्फ ध्यान दिनुपर्दछ ।”
महासचिव पोखरेलका अनुसार युरोपियन मोडेलबाट नेपाललाई बुझ्न खोज्दा देशको विकास हुन सकेको छैन । विश्वविद्यालयले पढ्ने विद्यार्थीको अधिकार सुनिश्चित गर्नुपर्ने भन्दै विद्यार्थीका माग सम्वोधन गर्न सक्ने विद्यार्थी मात्र नेता हुने वातावरण निर्माण गर्न पाखरेलले सबै विद्यार्थीलाई आह्वान गर्नुभयो ।
कार्यक्रममा उपकुलपति प्रा.डा.नन्दबहादुर सिंहले नेपालका विश्वविद्यालय नै खाली हुने गरी युवा विद्यार्थीहरु विदेश पलायन भइरहेको तर्फ सरोकारवालाको ध्यान जानुपर्नेमा जोड दिनुभयो । विश्वविद्यालयबाट अब राजनीतिक संस्कार बिजारोपण गर्नुपर्ने उपकुलपति प्राडा.सिंहको भनाई थियो ।
