११ मंंसिर २०८०, सोमबार
कर्णाली स्वास्थ्य विज्ञान प्रतिष्ठान जुम्लाका डा.तुलाकृष्ण गुप्ता अन्तर्राष्ट्रियस्तरको रिसर्च आर्टिकल प्रतिस्पर्धामा ‘बेष्ट पोस्टर–२०२३’ घोषित हुनुभएको छ ।
‘द बेसरोर सेन्टर फर ग्लोबल फ्यामिली मेडिसिन’ क्यानडाले प्रतिस्पर्धामा उत्कृष्ट उहाँलाई ‘डा.प्याट्रिक चिज मेमोरियल रिसर्च अवार्ड’ प्रदान गर्दै यही नोभेम्बर ९, २०२३ मा ‘बेष्ट पोस्टर–२०२३’ घोषणा गरेको हो । विश्वव्यापीरुपमा प्राप्त रिसर्च आर्टिकलहरुमा डा.गुप्ताको आर्टिकल उत्कृष्ट छनोट भएको प्रतिष्ठान जुम्लाका उपकुलपति डा.मंगल रावलले जानकारी दिनुभयो ।
उहाँका अनुसार डा.गुप्ताले प्रविष्ट गरेको रिसर्च आर्टिकल ‘प्याटर्न अफ स्किन डिजिज ईन हाई अल्टिच्यूड अफ नेपाल एण्ड रोल अफ जिपिएस ईन इट्स म्यानेजमेन्ट’ शीर्षकमा तयार गरिएको थियो । खासगरी उच्च भागमा बस्ने समुदायका नागरिकको छालाको रोगको प्रकृति, त्यसको पहिचान, निदान एवं समाधानमा जनरल प्राटिक्सनरहरुले खेलेको भूमिका, भएका गतिविधि र त्यसले पारेको सकरात्मक प्रभाव समेटिएको रिसर्च आर्टिकल आफूले तयार गरेको डा.गुप्ताले बताउनुभयो ।
प्रतिष्ठान जुम्लाका जनरल प्राटिक्स एण्ड इमरजेन्सी मेडिसिन विभागका प्रमुख डा.गुप्तालाई ‘द बेसरोर सेन्टर फर ग्लोबल फ्यामिली मेडिसिन’ क्यानडाले भनेको छ, “तपाईको पोस्टरमा ‘नेपालको उच्च भागमा छाला रोगको ढाँचा र यसको व्यवस्थापनमा जिपीको भूमिका’ शीर्षकमा स्कलोर सामग्री, बेसरोर मूल्य, प्रस्तुतिको क्षेत्रमा उत्कृष्ट मूल्याङ्कन र मापदण्ड अत्यन्तै सुन्दर तरिकाले उल्लेख गरिएको छ ।”
उक्त आवार्डको सम्मानमा उक्त सेन्टरले आगामी २०२४ नोभेम्बर ६ देखि ९ चार दिनसम्म क्यानडाको भ्यानकुभरमा सम्पन्न हुने फ्यामिली मेडिसिन फोरममा अतिथि वक्ताका रुपमा १० मिनेटको प्रस्तुति राख्नका लागि डा.गुप्तालाई आमन्त्रण गरेको छ । उक्त फोरम सम्पन्न भएपश्चात् सेन्टरअन्तरगको साईन्टिफिक कमिटिले उहाँको कामलाई जर्नलमा प्रकाशनका लागि समीक्षा र सम्पादकीय कार्यमा सहयोग पु¥याउने बताइएको छ ।
