२८ कात्तिक २०८०, मंगलबार
नेपाली हिन्दुहरुको दोस्रो महान् पर्व तिहार (दिपावली)को रमझम सहरदेखि गाउँमा बढिरहँदा कर्णाली स्वास्थ्य विज्ञान प्रतिष्ठान जुम्लाको जनस्वास्थ्य टोली भूकम्पपीडितहरुको उपचारमा ब्यस्त छ । प्रतिष्ठान जुम्लाका जनस्वास्थ्य डीन प्राडा.मुुनिराज क्षेत्री नेतृत्वको छ जनाको टोली एक सातादेखि भूकम्प प्रभावित क्षेत्रमा पुगेर पीडितहरुको उपचार गरिरहेको छ ।
उहाँसँगै डा.ओमप्रकाश काफ्ले, मनोसामाजिक परामर्शदाता नन्दराज आचार्यलेसहित जाजरकोट र रुकुमपश्चिमका प्रभावित जिल्लाका पीडितहरुलाई जनचेतना, उपचार सेवा र राहत सामग्री नपुगेर संकट व्यहोरिरहेकालाई सहयोग गर्दै आएको छ । यसपालिको तिहार भूकम्पपीडितहरुको उपचार सहयोगमा बिताउने गरी अहिले नलगाड नगरपालिकाका बिरामीको उपचारमा रहेको उहाँले बताउनुभयो ।
“हामी एक सातादेखि पीडितहरुकको उपचार सेवामा तल्लिन छौं,” उहाँले भन्नुभयो, “अब नलगाडपछि रुकुमपश्चिमको आठबीसकोट नगरपालिकामा जाँदैछौं ।” यस अघि जाजरकोटको भेरी र छेडागाड नगरपालिका तथा रुकुपश्चिमको चौरजहारी, सानीभेरी, मुसिकोट नगरपालिका र त्रिवेणी गाउँपालिका उपचार सेवा दिइएको डीन प्राडा.क्षेत्री जनाउनुभयो ।
उहाँका अनुसार उपचार सेवा प्रवाहबाट प्रत्यक्ष परोक्ष गरेर करिब तीन हजार भूकम्पपीडितहरु लाभान्वित भएका छन् । “भूकम्प प्रभावित क्षेत्रमा चिसो बढ्दै गएको छ । चिसोले दम, निमोनिया र रुघाखोकीका बिरामी बढ्ने खतरा छ,” उहाँले भन्नुभयो, “खानेपानी, शौचालयको अभावले वातावरणीय प्रदुषण बढ्ने र त्यसले रोग निम्तिने समस्या पनि त्यत्तिकै देखिएको छ ।”
यसको सामना कसरी गर्ने भन्ने कुरामा तीनै तहका सरकारहरुले दीर्घकालीन रणनीतिक योजना बनाउन आवश्यक रहेको डीन क्षेत्रीको भनाई छ । उहाँका अनुसार नागरिकहरुको स्वास्थ्यमा आईपर्ने संकट निवारण कसरी गर्नेमा प्रतिष्ठानले पनि आफ्नो योजना बनाएर अगाडि बढ्ने छ ।
बारेकोट गाउँपालिकाको रामीडाँडा केन्द्रबिन्दु बनाएर यही कार्तिक १७ गते शुक्रबार राति ११ः४७ बजे गएको ६ दशमलव ४ रेक्टर स्केलको भूकम्पमा परी दुई पचास भन्दा बढी घाईते भएका थिए । एकसय ५७ जनाको उक्त भूकम्पमा परी मृत्यु भएको थियो ।
