२० कात्तिक २०८०, सोमबार
यही कात्तिक १७ गते शुक्रबार राति ११ः४७ मा जाजरकोट बारेकोट गाउँपालिकाको रामीडाँडा केन्द्रबिन्दु बनाएर गएको ६ दशमलव ४ रेक्टर स्केलको भूकम्पबाट एक सय ५७ जनाको ज्यान गइसकेको छ । कर्णाली प्रदेश प्रहरी कार्यालय सुर्खेतका अनुसार उक्त भूकम्पबाट नौ सय १० पूर्ण र दुई हजार आठ सय ६१ भवनमा आंशिक क्षति पुगेको छ । भूकम्पमा परी दुई सय ४६ जना घाईते भएका छन् ।
घाईतेहरु मध्ये एक सय ४६ जना उपचारपश्चात् घर फर्किसकेका छन् । तरपनि कर्णाली सरकारले खोज, उद्धार र राहतका कामलाई निरन्तरता दिएको छ । यसमा कर्णाली प्रदेश सरकारको सिंगो मन्त्रिपरिषद्का सदस्यहरु भूकम्प प्रभावित क्षेत्रमा खटिएर काम गरिरहेको कर्णाली प्रदेश सरकारका मुख्यमन्त्री राजकुमार शर्माले जानकारी दिनुभयो । उहाँका अनुसार खोज, उद्धार र राहतका कामहरु सकेपछि भूकम्पबाट विस्थापितहरुको पुनस्र्थापनाका कार्यक्रमलाई अगाडि बढाउन तीव्र तयारी गरिनेछ ।
आज सोमबार बिहानैदेखि मुख्यमन्त्री राजकुमार शर्मा प्रभावित क्षेत्र जाजरकोटमै हुनुहुन्छ । उहाँले आवश्यकता अनुसार प्रभावित क्षेत्रका अन्य जिल्लाहरुमा समेत सक्रिय हुने जनाउनुभयो । आर्थिक मामिला तथा योजनामन्त्री बेदराज सिंह शनिबारदेखि जाजरकोटमै सक्रिय रहनुभएको बताइएको छ ।
यता आन्तरिक मामिला तथा कानूनमन्त्री कृष्णबहादुर जिसी र सामाजिक विकास मन्त्री खड्गबहादुर पोखरेल सुर्खेतमा बसेर आवश्यक राहत संकलनदेखि आपूर्ति व्यवस्थापनलगायतका काममा यता निरन्तर लागिरहनुभएको छ । उहाँले शनिबारदेखि सुर्खेत विमानस्थलमा रहेर प्रभावित क्षेत्रका लागि आवश्यक राहत सामग्री एकद्वार प्रणालीमार्फत् जिल्लामा पठाउने काम भइरहेको जनाउनुभयो ।
भूमि व्यवस्था, कृषि तथा सहकारीमन्त्री भीमप्रकाश शर्मा रुकुमपश्चिम र सल्यानमा खटिएर काम गर्ने जिम्मेवारी प्राप्त गर्नुभएको छ । जलस्रोत तथा उर्जा विकासमन्त्री उर्मिला विश्वकर्मा उर्जासहित खानेपानी लगायतका कामहरुमा प्रभावित क्षेत्रमै खटिएर काम गर्ने प्रदेश सरकारका प्रवक्ता एवं कानूनमन्त्री जिसीले बताउनुभयो । उक्त मन्त्रालयले भूकम्पबाट क्षतिग्रस्त खानेपानीका योजना मर्मत गर्नेछ ।
त्यसैगरी, भौतिक पूर्वाधार तथा सहरी विकासमन्त्री मंगलबहादुर शाहीले भूकम्पबाट जाजरकोट र रुकुमपश्चिम जिल्लाका ध्वस्त भौतिक संरचनाको तथ्याङ्क संकलनदेखि अभिलेख राख्ने कार्यमा सक्रिय हुनेछ । त्यसमा उद्योग, पर्यटन तथा वातावरणमन्त्री कृष्णबहादुर बिसीले आवश्यक सहयोग गर्नुहुने बताइएको छ । प्रभावित क्षेत्रका लागि विभिन्न निकाय तथा क्षेत्रबाट रकम संकलन हुँदै गरेको र प्रदेश सरकारले छुट्ट्याएको रकम केही दिनभित्र सम्बन्धित पालिकामा पठाइने प्रवक्ता जिसीले जनाउनुभयो ।
