१८ कार्तिक २०८०, शनिबार
गए राति जाजरकोटको रामीडाँडा नजिक केन्द्रबिन्दु बनाएर गएको ६.४ म्याग्निच्यूडको भूकम्पबाट जाजरकोट र रुकुमपश्चिम गरी एक सय ३८ जनाको मृत्यु भएको छ ।
कर्णाली प्रदेश सरकार आन्तरिक मामिला तथा कानून मन्त्रालयका अनुसार गए रातिको भूकम्पबाट जाजरकोटमा ६९ महिला र ३० पुरुष गरी ९९ जनाले ज्यान गुमाएका छन् । त्यस्तै, रुकुमपश्चिममा १९ पुरुष र १९ महिला गरी ३८ जनाको ज्यान गएको कानूनमन्त्री एवं प्रदेश सरकारका प्रवक्ता कृष्णबहादुर जिसीले जानकारी दिनुभएको छ ।
उहाँका अनुसार अहिलेसम्मको तथ्याङ्कलाई आधार मान्दा भूकम्पबाट ८१ जना जाजरकोट, ७२ रुकुमपश्चिम, जुम्ला र दैलेखमा तीन÷तीन र एक सल्यान गरी एक सय ६० जना घाईते भएका छन् । उनीहरुको जाजरकोट, रुकुमपश्चिम, सुर्खेत र बाके जिल्लाका अस्पतालहरुमा उपचार भइरहेको प्रदेश सरकारले जनाएको छ ।
जाजरकोट घटनास्थल रुकुमपश्चिमको आठबीसकोट नगरपालिकामा प्रधानमन्त्री पुष्पकमल दाहाल ‘प्रचण्ड’सहित पूर्वगृहमन्त्री जनार्दन शर्मा, उर्जामन्त्री शक्ति बस्नेत, र कर्णालीका मुख्यमन्त्री राजकुमार शर्मा पुगेर मृतकका परिवार र घाइतेहरुलाई भेट्नुभएको छ । भेटमा प्रधानमन्त्रीसहित मुख्यमन्त्रीले भूकम्पबाट प्रभावितको खोज उद्धार, घाइतेहरुको उपचार तथा प्रभावित परिवारहरुलाई राहत दिन सरकार सक्रिय रहेको बताउनुभएको छ । शुरबहादुर सिंह
