१८ कार्तिक २०८०, शनिबार
गए राति जाजरकोटको रामीडाँडा नजिक केन्द्रबिन्दु बनाएर गएको ६.४ रेक्टर स्केलको भूकम्प प्रभावित क्षेत्रमा प्रधानमन्त्री पुष्पकमल दाहाल (प्रचण्ड) पुग्नुभएको छ ।
प्रधानमन्त्री प्रचण्ड आज बिहान ८ः३० बजेतिर जाजरकोट पुग्नुभएको हो । जाजरकोट पुग्नुभएका उहाँले प्रमुख जिल्ला अधिकारी सुरेश सुनारसँग भूकम्पको क्षतिको विवरण लिनुभएको छ । सुरुमा जाजरकोटको खलंगाको प्रभावित क्षेत्रको वस्तुस्थिति बुझिसकेपछि अहिले प्रधानमन्त्री प्रजिअ सुनारसहित सबैभन्दा बढी क्षतिग्रस्तस्थल नलगाड नगरपालिकामा पुग्नुभएको जिल्ला प्रशासन कार्यालय जाजरकोटका सूचना अधिकारी हरिश्चन्द्र शर्माले जानकारी दिनुभयो ।
उहाँका अनुसार प्रधानमन्त्री प्रचण्डले भूकम्प प्रभावित क्षेत्रको राहत तथा उद्धारलाई तीव्र बनाउन तथा यसका लागि कुनै कसर बाँकी नराख्न प्रजिअ सुनारसहित सुरक्षा संयन्त्रको टोलीलाई निर्देशन दिनुभएको छ । क्षतिको पूर्ण विवरण नआईसकेकोले प्रारम्भिक क्षतिको विवरणबारे प्रजिअले प्रधानमन्त्रीलाई जानकारी गराउने काम भएको सूचना अधिकारी शर्माले राससलाई जानकारी दिनुभयो ।
भूकम्पको केन्द्रबिन्दु मानिएको बारेकोट गाउँपालिकासँगको सूचना सम्पर्क राम्रो नहुँदा घरहरु भत्केको छ भन्ने जानकारी भएपनि सत्य तथ्य कुरा आउन नसकेको उहाँले बताउनुभयो । उहाँका अनुसार उक्त गाउँपालिकाको क्षतिबारे जानकारी लिन सूचना सम्पर्क जोड्ने प्रयास भइरहेको छ ।
सूचना अधिकारी शर्माले प्रधानमन्त्रीको साथमा उर्जामन्त्री शक्तिबहादुर बस्नेत र पूर्वगृहमन्त्री जनार्दन शर्मासहित स्वास्थ्यकर्मीहरुको टोली घटनास्थलमा पुगेको बताउनुभयो । जाजरकोट क्षतिग्रस्त क्षेत्रको अध्ययनपश्चात् प्रधानमन्त्री प्रचण्ड रुकुमपश्चिमको भूकम्पबाट भएको क्षति र त्यसको प्रभावका बारेमा बुझ्न जाने बताइएको छ ।
