३ कार्तिक २०८० शुक्रबार
द्वन्द्वग्रस्त देश इजरायल भ्रमणबाट फर्किएका अमेरिकी राष्ट्रपति जो बाइडेनले ह्वाइट हाउसबाट देशवासीलाई सम्बोधन गरेका छन् ।
सम्बोधनका क्रममा उनले हमास र रुसी राष्ट्रपति भ्लादिमिर पुटिनलाई जोडेका छन् । उनले भने, ‘हमास र पुटिन दुबैबाट अलग–अलग खतरा छ, तर दुबैमा एउटा समानता छ । दुबै छिमेकमा लोकतन्त्रलाई समाप्त पार्न चाहन्छन् ।’
इजरायल भ्रमणका क्रममा बाइडेनले हमासको आक्रमणबाट पीडित मानिसहरुलाई पनि भेटेका थिए । ‘राष्ट्रपतिका रुपमा मेरा लागि बन्धक बनाइएका अमेरिकी नागरिकको सुरक्षाभन्दा ठूलो केही छैन’ इजरायल–हमास संघर्षमा दुबैतर्फबाट प्रभावित आम ममानिसप्रति समवेदना व्यक्त गर्दै उनले भने ।
इजरायल र युक्रेनलाई सहयोग नगर्नु उपयुक्त नभएको भन्दै उनले अमेरिकी कंग्रेसलाई उपयुक्त कदम चाल्न र आर्थिक सहायता प्याकेज पास गर्न आग्रह गरेका छन् । सम्बोधनका क्रममा उनले भनेका छन्, ‘यो यस्तो समय हो, जुन बेला हामीले लिने निर्णयले आगामी दशकको भविश्य तय गर्ने छ ।’
बाइडेनले थप कति आर्थिक सहायता पास गराउन खोेजेका हुन् भन्ने सम्बोधनका क्रममा खुलाएका छैनन् । तर यो १०० बिलियन डलर हुने अनुमान गरिएको बीबीसीले जनाएको छ । अनलाइन खबरबाट ।
