OnlinePana

आज : २०८१ बैशाख १२ गतेPreeti to UnicodeUnicode to PreetiRoman to UnicodeDate Converter
कोरपाटी संवाददाताआश्विन २४, २०८०सुर्खेत
२३४ पटक

२४ असोज २०८०, बुधबार

कर्णाली प्रदेशको राजधानी वीरेन्द्रनगर सुर्खेतमा आजको दृश्य अलि फरक थियो । जिल्ला प्रहरी कार्यालय सुर्खेतको कन्ट्रोल कक्षमा प्रहरी होइन, उपप्रधान तथा रक्षामन्त्री पूर्णबहादुर खड्का आफै बसेर पीडितलाई सिधा फोन सम्पर्क गर्नुभयो ।

रक्षामन्त्री खड्काले सुर्खेत गुर्भाकोट नगरपालिका १४ का ३१ वर्षीय अर्जुन पुनविरुद्ध सवारी ज्यान सम्बन्धी मुद्दा दिने जाहेरवाला आठबीस नगरपालिका ५ सिंगासैन दैलेखका ४० वर्षीय मोतिराम पुरीसँग सिधा फोन सम्पर्कको संवादमा भन्नुभयो, “मातिरामी जी ! म पूर्णबहादुर खड्का, उपप्रधान तथा रक्षामन्त्री बोल्दैछु । सुन्नुस् म तपाईको मुद्दाको प्रगतिबारे जानकारी दिदैछु । मोतिराम जी ! तपाई दिएको मुद्दा अनुसार प्रतिवादी पक्राउ गरिएको छ । आवश्यक सबुद प्रमाण संकलन, क्षतिपूर्तिको लागि पहल र अनुसन्धान भइरहेको छ ।”

रक्षामन्त्री खड्काले थप्नुभयो, “सुरक्षित कर्णाली विशेष अभियानअन्तरग पीडित सहायता शुभारम्भ गर्ने क्रममा तपाईसँग कुरा गरिएको हो । आजदेखि तपाईले दिएको उजुरी प्रहरी स्वयंले हेर्दै जाने र तपाईको आवश्यकता भएमा प्रहरीले जानकारी दिनेछ । हाम्रो मुद्दा कहाँ पुग्यो, कस्तो अवस्थामा छ भनेर सोधिरहनुपर्ने झञ्जट अब हुँदैन ।”

त्यसैगरी, उहाँले महिला पीडितसँग पनि सिधा फोनमार्फत संवाद गर्दै भन्नुुभयो, “राजकुमारी पाण्डे बोल्नु भा हो । नमस्कार राजकुमारी जी ! म पूर्णबहादुर खड्का, उपप्रधान तथा रक्षामन्त्री तपाईसँग कुरा गर्दैछु, जिल्ला प्रहरी कार्यालय सुर्खेतबाट । तपाईले बहुबिबाहसँग सम्बन्धित उजुरी दिनुभएको रहेछ । त्यसको अहिलेसम्म प्रहरीबाट के–के प्रगति भयो भन्नेबारे जानकारी गराउँदैछु । प्रतिवादीलाई सम्बन्धित सुर्खेत जिल्ला अदालतबाट म्याद थपको अनुमति लिई बयानसम्मको कार्य प्रगति भएको । खेमराज बुढाक्षेत्रीसमेत छ जना प्रतिवादीको घटना विवरण कागज भएको, प्रतिवादीहरुसँगै बसेको र फेसबुकमा श्रीमान् श्रीमती भनी कुरा भएको प्रमाणसमेत संकलन गरिएको र यसबारे प्रहरीले अनुसन्धान गरिरहेको छ ।”

उहाँले तपाई जस्ता पीडितहरुले आउनुपर्ने भएमा मात्रै प्रहरीले तपाईलाई जानकारी गर्ने र हिजोका दिनमा सँधै आएर मेरो के भयो भन्ने ? अवस्थाको आजदेखि अन्त्य भएकोसमेत पीडितलाई रक्षामन्त्री खड्काले जानकारी दिनुभएको थियो । उहाँका अनुसार पीडितहरुले सँधै प्रहरीमा आउन नपर्ने र आजका दिनदेखि प्रहरी आफैले फोन गरेर मुद्दाको काम कारवाही र प्रगतिबारे सहजै जानकारी दिलाउनेछ ।

कर्णाली प्रदेश प्रहरी कार्यालय सुर्खेतले थालेको सुरक्षित कर्णाली विशेष अभियानअन्तरगत ट्राफिक नियम पालन, पीडित सहायता कार्यक्रम आजदेखि आरम्भ भएको छ भने लागु औषधविरुद्ध लालटिन अभियानको भोलि रक्षामन्त्री खड्काबाट शुभारम्म हुने कार्यक्रम रहेको कर्णाली प्रदेश प्रदेश प्रहरी प्रमुख प्रहरी नायब महानिरीक्षक भीमप्रसाद ढकालले जानकारी दिनुभयो । शुरबहादुर सिंह

 

प्रतिकृया दिनुहोस्