२२ असोज २०८०, साेमबार
कर्णाली प्रदेश सरकारका मुख्यमन्त्री राजकुमार शर्माले मानवीय सेवाले साझा भविश्य निर्माण गर्ने बताउनुभएको छ ।
नेपाल रेडक्रस सोसाइटी कर्णाली प्रदेश र जुनियर युथ रेडक्रस सर्कलद्वारा आज वीरेन्द्रनगर सुर्खेतमा आयोजित दुईदिने प्रदेशस्तरीय कार्याशालाका उद्घाटन समारोहलाई सम्बोधन गर्दै मुख्यमन्त्री शर्माले मानवीय सेवालाई सबैले पहिलो प्राथमिकतामा राखेर काम गर्नुपर्नेमा जोड दिनुभयो । उहाँले भन्नुभयो, “संकट, आपत् र विपदमा हामीले मानवीय हितलाई केन्द्रमा राखेर काम गर्नुपर्दछ । गलत र सहि के हो भनेर पहिचान गर्न जरुरी छ ।”
कर्णालीवासीको सुख र खुसीका लागि आर्थिक सम्पन्नता र समाजिक न्याय आवश्यक भएको बताउनुभएका उहाँले परोपकारी क्षेत्रका रेडक्रसको महत्वपूर्ण योगदान रहेको बताउनुभयो । रेडक्रसलगायतका समाजिक संघ संस्थाले मानव जातिको सुख र शान्तिका लागि गरेको काम र यसको संघर्ष सबैले अध्ययन गर्न आवश्यक रहेको उहाँको भनाई थियो ।
विकास, समृद्धि र समाजिक रुपान्तरणमा राष्टिय एकता अपरिहार्य रहेको बताउनुभएका मुख्यमन्त्री शर्माले भन्नुभयो, “समाजलाई नयाँ उचाईमा उठाउन, योगदान एवं सकारात्मक प्रतिस्पर्धा गर्न आवश्यक छ । त्यसका लागि राज्य, समाजिक संघ संस्थाबीचमा सहकार्य गरेर मात्र विकास गर्न संभव देखिन्छ ।
उक्त दुईदिने कार्यशालामा १० जिल्ला जिल्लाका युवा सर्कलका प्रतिनिधिहरुको सहभागिता रहेको जुनियर युथ रेडक्रस सर्कलका अध्यक्ष नवीन लामिछानेले जानकारी दिनुभयो ।
