३२ साउन २०८०, बिहीबार
नेकपा माओवादी केन्द्रका नेता तथा कर्णाली प्रदेश इञ्चार्ज मातृकाप्रसाद यादवले गलत संगतका कारण माओवादी बिग्रिएको बताउनुभएको छ ।
‘जनतासँग माओावदी विशेष रुपान्तरण अभियान’को तीन महिने जिम्मेवारी लिएर कर्णाली प्रदेशको राजधानी वीरेन्द्रनगर सुर्खेतमा आईपुग्नुभएका इञ्चार्ज यादवले आज पत्रकारहरुसँग कुराकानी गर्दै फटाहाहरुसँगको संगतले माओवादी बिग्रेको जिकिर गर्नुभयो । “युद्धको बेला माओवादीले जनताको घरदैलोमा उनीहरुसँगै भिजेर काम गर्यो,” उहाँले भन्नुभयो, “पछिल्लो एक दशकमा भ्रष्ट तथा दलालहरुसँगको संगतमा लागेर माओवादीले आफ्नो साख कमजोर बनाएको छ ।”
पदमा नहुँदा अराजक र पद पाउँदा निरंकुश बन्ने संस्कृति यसभित्र हावी भएको बताउँदै उहाँले सामुहिकतामा निर्णय गरी सेवा भावका साथ काम गर्ने जिम्मेवारी सबैको काँधमा आईपुगेको जनाउनुभयो । ‘घरघरमा माओवादी, जनजनमा माओवादी’ भन्ने ध्येयका साथ अभियान अगाडि बढेकोले राजा नभई सेवक भएर काम गर्न नेता तथा कार्यकर्ताहरुलाई नेता यादवले निर्देशन दिनुभयो ।
पूर्वमन्त्रीसमेत रहेका यादवले गणतान्त्रिक व्यवस्थामा व्यवस्थापनको अभाव भएको प्रतिक्रिया दिनुभयो । उहाँका अनुसार कर्णालीले जनताका खाँतिर जनयुद्धदेखि संघर्ष र योगदान दिँदै आएको छ । त्यस्तै, माओवादी नेता कालीबहादुर मल्लले संस्थागत निर्णयलाई अनुशासित ढंगबाट कारवाही गरिनुपर्नेमा जोड दिनुभयो ।
नेकपा (माओवादी केन्द्र) कर्णाली प्रदेश समिति अध्यक्ष बिमला केसीले जनताका समस्यालाई केन्द्रमा राखेर पार्टीसहित सबै संगठनहरुले मुद्दाहरुलाई साझा बनाएर हल गर्नेतर्फ लाग्नुपर्ने सुझाउनुभयो । उहाँका अनुसार भदौ ४ गते प्रधानमन्त्री एवम् पार्टी अध्यक्ष पुष्पकमल दाहाल ‘प्रचण्ड’ पार्टी प्रशिक्षण भेलालाई सम्बोधन गर्न सुर्खेत आउनुहुनेछ ।
