१८ असार २०८०, सोमबार
कर्णाली प्रदेश सरकारका मुख्यमन्त्री राजकुमार शर्माले विकास समाज रुपान्तरणको महत्वपूर्ण प्रक्रिया भएको बताउनुभएको छ । हाम्रो विकासले विनास ल्याउँदा त्यसलाई रुपान्तरण भन्ने नसकिने उहाँले बताउनुभयो ।
आज सुर्खेत वीरेन्द्रनगरमा कर्णालीको विकास निर्माणसम्बन्धी समसामयिक विषयमा आयोजित बहस कार्यक्रममा बोल्दै उहाँले राज्यले समाज रुपान्तरणका लागि प्रक्रियामुखी नभई कार्यमुखी भएर जानुपर्नेमा जोड दिनुभयो । “राज्य दीर्घकालीन विकासतर्फ अग्रसर नभई अँझै प्रक्रियामै अल्झिरहेको छ,” उहाँले भन्नुभयो, “हाम्रो राजनीति गर्ने तवरसमेत पछौटेपनमा आधारित छ । जहाँ एक दलले अर्कोको अस्तित्व स्वीकार गर्न नसकेको अवस्था छ ।”
हाम्रो दृष्टिकोण र सोचले विकासलाई अझ पर धकेल्ने काम गरिरहेको तर्क गर्नुभएका मुख्यमन्त्री शर्माले जल, जंगल, जडीबुटी र प्रकृतिले धनी क्षेत्रको स्रोतको बेलैमा सदुपयोग गर्न सकिए कर्णाली एक्लैले सिंगो मुलुकलाई पाल्न सामथ्र्य राख्ने दावी गर्नुभयो । उहाँले अहिलेसम्म बनेका ऐन नियमहरुमा देखिएको अन्तरविरोधलाई हटाएर ती सबै परिणाम देखिने गरी कार्यान्वयनमा ल्याउनतर्फ लाग्नुपर्ने जनाउनुभयो ।
