१७ असार २०८०, आइतबार
कर्णाली प्रदेश सरकारका मुख्यमन्त्री राजकुमार शर्माले परिणाम देखिने गरी काम गर्न प्रतिवद्ध भएको बताउनुभएको छ ।
वितरणमुखी योजनाले विकासका नाममा बद्नाम मात्र हुँदै गएको संकेत गर्नुभएका मुख्यमन्त्रीले आज बसेको प्रदेशसभाको दोस्रो अधिवेशनकको सत्रौं बैठकमा सरकारको धारणा राख्दै सदनमै हरेक विषयमा सत्तापक्ष र प्रतिपक्ष दुवैले आवश्यक सल्लाह गरेर अगाडि बढ्ने जनाउनुभयो ।
एकता भएर मात्र कर्णालीवासीको विकास र उन्नयन हुने उहाँको भनाई थियो । “हामीको सबैको दुश्मन भनेको गरिबीको हो,” उहाँले भन्नुभयो, “कर्णालीको समृद्धि र विकासका लागि सबै एकमत भएर जानुको विकल्प छैन, ।” मुख्यमन्त्री शर्माले आर्थिक सम्पन्नता र सामाजिक न्यायबाट मात्र समृद्धि संभव रहेको बताउनुभयो ।
नीति तथा कार्यक्रम र बजेट अध्ययन गरी कर्णालीका बस्ती र आवश्यकताहरु नियाल्दै गर्दा बजेट र आवश्यकताबीच अन्तर विरोध रहेको बताउनुभएका उहाँले भन्नुभयो, “यसबाट माथि उठेर कसरी समाधान खोज्नुपर्छ । हाम्रा आवश्यकता धेरै छन् तर ती आवश्यकताभित्र सबैभन्दा अपरिहार्य कुरा के हो भन्ने बुझेर त्यसमा प्र्राथमिकीकरण दिँदै बजेट विनियोजन गर्नुपर्दछ ।”
कर्णाली प्रदेशमा बनेका सडक र भवनहरु गुणस्तरहीन् भएको भन्दै मुख्यमन्त्री शर्माले अब बन्ने भवनहरु रु.३० लाख भन्दा कम बजेटमा नबन्ने प्रष्ट्याउनुभयो । संघ तथा प्रदेशले अन्ततः स्थानीय तहमै बजेट दिएकोले अब तीनै तहका जनप्रतिनिधि बढी जिम्मेवार भएर काम गर्नुपर्ने उहाँको भनाई थियो ।
