१४ असार २०८०, बिहीबार
कर्णाली प्रदेशको राजधानी सहर वीरेन्द्रनगर सुर्खेतमा ‘राष्ट्रिय कचहरी’ सुरु भएको छ ।
‘राष्ट्रि«य कचहरी’कोे उद्घाटन आज कर्णाली प्रदेश सरकारका भौतिक पूर्वाधार तथा सहरी विकासमन्त्री मंगलबहादुर शाहीले गर्नुभएको हो । उक्त कार्यक्रममा बोल्दै मन्त्री शाहीले संघीयतामा जनताका मागहरु धेरै भएको तर आवश्यकता अनुसार पुरा हुन नसकेको बताउनुभयो । “जनताका माग र आवश्यकता पुरा गर्ने आश्वासन दिइयो” उहाँले भन्नुभयो, “तर ती पुरा नहुँदा उनीहरुमा निराशा बढेको छ ।” संघीय व्यवस्था राम्रो हुँदा पनि त्यसको व्यवस्थापन उचित नहुँदा केही असन्तुष्टि उब्जेको भन्दै यसको सुदृढीकरण आवश्यक रहेको उहाँको भनाई थियो ।
लुम्बिनी प्रदेशसभा सदस्य सञ्जु चौधरीले संघीयताको पाँच वर्षीय कार्यकाल बितेको तर अपेक्षित प्रतिफल नदेखिएको टिप्पणी गर्नुभयो । यसका लागि तीन तहका सरकारको कार्यलाई समीक्षा गर्नुपर्ने उहाँको भनाई थियो । वीरेन्द्रनगर नगरपालिकाका प्रमुख मोहनमाया ढकालले प्रत्येक वर्ष आउने राष्ट्रिय बजेट पञ्चवर्षीय योजनाको सिद्धान्त, उद्देश्य र मार्गनिर्देशन अनुसार आउँछ आउँदैन भनेर प्रश्न गर्नुभयो ।
उहाँले तीन तहका सरकारबीच आपसी समन्वय, सहकार्य र सहअस्तित्व कायम नभएको जिकिर गर्नुभयो । राष्ट्रिय योजना आयोगका पूर्व सदस्य तथा अर्थविद डा.पोषणराज पाण्डेले समावेशी विकास आजको आवश्यकता हो भन्नुभयो । वैदेशिक रोजगारका लागि दैनिक दुई हजार देश बाहिर जाने अवस्थाले मुलुकको कुल ग्राहस्थ उत्पादन असर परेको उहाँले बताउनुभयो ।
संयुक्त राष्ट्र संघ खाद्य तथा कृषि संगठन नेपाल तथा भूटानका देशीय प्रतिनिधि केन शिमिजुले विश्वमा बढ्दै गएको असमानता, कोभिड र सिरिया युद्धको असर, राजनीतिक संकट र वातारणीय असरले नेपाल र त्यसमा कर्णाली जस्ता क्षेत्रलाई असर पारेको बताउुनभयो । यसका विषयमा बहुपक्षीय सवाल उठान भएको र यसमा खाद्य तथा कृषि संगठनको आवश्यक सहयोग हुने उहाँको भनाई थियो ।
नगरपालिका संघ नेपालका अध्यक्ष नरुलाल चौधरीले संविधानमा व्यवस्था भएका साझा सूचीका अधिकारहरुको टुंगो नलाग्दा स्थानीय तथा प्रदेश सरकारलाई काम गर्न असहज भएको जनाउनुभयो । संघीय शिक्षा तथा निजामती कर्मचारी ऐन नबनेका कारण पनि समस्या झेल्नुपरेको उहाँले बताउुनभयो ।
स्थानीय सरकार सवलीकरण, द एशिया फाउण्डेसन, अष्ट्रेलियन एड, सेभ द चिल्ड्रेन, गुड नेइबर्स इन्टरनेश्नल, वल्र्ड भिजन, प्लान इन्टरनेश्नल, एक्सन एड, मिसन ईष्ट र प्राक्टिकल एक्सनको सहकार्य र कर्णाली एकीकृत ग्रामीण विकास तथा अनुसन्धान केन्द्र (किर्डाक) नेपालको आयोजनामा ‘राष्ट्रि«य कचहरी’ दुई दिनसम्म सञ्चालन हुनेछ ।
