१० बैशाख २०८०, आइतबार
कर्णाली प्रदेशसभामा ‘कर्णाली प्रदेश प्रशिक्षण प्रतिष्ठान विधेयक (स्थापना तथा सञ्चालन) सम्बन्धमा व्यवस्था गर्न बनेको विधेयकमाथि सभामा सैद्धान्तिक छलफल भएको छ ।
प्रदेशसभाको आज बसेको १३औं बैठकमा सभामुख नन्दा गुरुङले कर्णाली प्रदेश सरकारका आन्तरिक मामिला तथा कानूनमन्त्री कृष्णबहादुर जिसीलाई छलफलका लागि विधेयक सभामा प्रस्ताव पेश गर्न अनुमति दिनुभयो । छलफलको सुरुमा भाग लिँदै प्रदेशसभा सदस्य महेन्द्र केसीले विधेयकले कर्णालीको जनशक्तिको व्यवस्थापकीय क्षमतामा भएको अभावलाई सम्बोधन गर्ने गरी अगाडि बढाउनुपर्ने धारणा राख्नुभयो ।
यसको संरचनासँगै कार्यशैली प्रभावकारी हुने खालको बनाउनुपर्ने उहाँको भनाई थियो । प्रदेशसभा सदस्य टेकराज पछाईले कर्णालीको समृद्धिका लागि यहाँको जनशक्ति अब्बल बनाउन र अभाव भएको जनशक्ति परिपूर्ति गर्न प्रतिष्ठान महत्वपूर्ण हुने बताउनुभयो । उहाँका अनुसार प्रदेश निजामती ऐन नहुँदा कर्णालीको आफ्नै जनशक्ति छैन । उपसचिव सचिव प्रदेश सरकारको आफ्नो छैन । यसले कर्णालीको कार्यसम्पादन र कार्यशैली अपेक्षाकृत हुन नसकेको उहाँको भनाई थियो ।
प्रदेशसभा सदस्य जीतबहादुर मल्लले प्रतिष्ठान प्रशासन एवं सुशासन सहयोगी संस्थामा रुपमा लिन सकिने धारणा राख्नुभयो । उहाँले भन्नुभयो, “सबल, सक्षम र उर्जाशील जनशक्ति उत्पादनमा गर्न प्रशिक्षण प्रतिष्ठानको अहम् भूमिका हुनेछ । यसका लागि प्रदेश निजामती सेवा जतिसक्दो छिटो आउनुपर्नेछ ।”
प्रदेशसभा सदस्यद्वय सन्तोषी शाही र दक्षिणा शाहीले प्रतिष्ठानले जनशक्तिको सीप, ज्ञान र दक्षतालाई अभिवृद्धि गर्ने गरी परिपक्व बनाउनुपर्नेमा जोड दिनुभयो । छलफलमा सदस्यहरुले उठाएका जिज्ञासा तथा तथा सुझावहरुको जवाफ दिँदै कानूनमन्त्री जिसीले सभामा प्राप्त सकरात्मक धारणा, जिज्ञासा र सुझावलाई समेटेर प्रतिष्ठान विधेयक सम्पन्न गरिने जनाउनुभयो ।
उहाँले प्रदेश सुशासन केन्द्र सुर्खेतर यस अन्तरगत जुम्लाको खिंच्चनेमा एकीकृत तालिम केन्द्रबाट व्यवसायिक तालिम सञ्चालन गर्ने गरी यसका केही कार्य प्रारम्भ भएको र केही ऐन बनाउनुपर्ने जनाउनुभयो । स्वदेशी तथा विदेशी क्षेत्रका व्यक्तिहरुलाई पनि तालिम प्रदान गर्ने फराकिलो दायरा बनाएर विधेयक ल्याइएको बताउनुभयो ।
उक्त विधेयकमाथि संशोधनको सूचनाका लागि ७२ घण्टाको समयसीमा राखिएको बताउँदै सभामुख गुरुङले अर्को बैठक यही बैशाख १५ गते मध्यान्ह ३ः०० बजे बस्ने जानकारी गराउनुभयो ।
कार्य व्यवस्था परामर्श समिति गठन
प्रदेशसभाको दोस्रो कार्यकालको पहिलो अधिवेशनको तेह्रौँ बैठकले सभामुख नेतृत्वको कार्य व्यवस्था परामर्श समिति गठन गरेको छ । कर्णाली प्रदेशसभा सञ्चालन भएको तीन महिनापछि उक्त समिति गठन भएको हो ।
सभामुख नन्दा गुरुङले उक्त समितिको सदस्यमा कल्याणी खड्का, टेकराज पछाई, देवेन्द्रबहादुर शाही, रणसिंह परियार, सन्तोषी शाही र हिक्मतबहादुर विष्ट रहेको बताउनुभयो । उहाँका समितिमा उपसभामुख यशोदा न्यौपाने र आन्तरिक मामिला तथा कानुनीमन्त्री कृष्णबहादुर जिसी पदेन सदस्य रहनेछन् ।
प्रदेशसभाको बैठकमा पेश हुने विषयहरूको प्राथमिकता तथा समयावधिको निर्धारण, बैठकलाई सुव्यवस्थित ढङ्गले सञ्चालन गर्ने र सभामुखले आवश्यक ठह¥याएको अन्य विषयमा परामर्श दिने काम समितिले गर्ने जनाइएको छ ।
