२६ चैत २०७९, आईतबार
कर्णाली प्रदेश सरकारमा नेकपा एमालेबाट सहभागी भएका मन्त्रीत्रयले राजीनामा दिनुभएको छ ।
प्रदेश सरकारका आर्थिक मामिला तथा योजनामन्त्री विनोदकुमार शाह, उद्योग, पर्यटन, वन तथा वातावरणमन्त्री जीतबहादुर मल्ला र सामाजिक विकासमन्त्री टेकराज पछाईले आज सरकारबाट राजीनामा दिनुभएको हो । मन्त्रीत्रयले मुख्यमन्त्री राजकुमार शर्मासमक्ष आज अपरान्ह ५ः०० बजे सामुहिक राजीनामा दिनुभएको थियो ।
मुख्यमन्त्री शर्माले गत माघ ११ गते विनोदकुमार शाहलाई आर्थिक मामिला तथा योजनामन्त्री, जीतबहादुर मल्ललाई उद्योग, पर्यटन, वन तथा वातावरण मन्त्रालय र टेकराज पछाईलाई सामाजिक विकासमन्त्रीमा नियुक्त गर्नुभएको थियो । तीनै मन्त्रीको कार्यकाल ७५ दिन रह्यो ।
एमाले सरकारबाट बाहिरिएपछि मुख्यमन्त्रीले पुनः विश्वासको मत लिनुपर्ने भएको छ । एमाले, राप्रपा र एकीकृत समाजवादीको समर्थनमा पुस २७ गते मुख्यमन्त्री हुनुभएका उहाँले माघ ६ गते विश्वासको मत लिनुभएको थियो । फागुन १८ गते राप्रपाले सरकारबाट समर्थन फिर्ता लिएपछि चैत्र १७ गते दोस्रो पटक विश्वास मत लिएको एक हप्तापछि एमाले सरकारबाट बाहिरिएकोले अब मुख्यमन्त्रीले तेस्रो पटक विश्वासको मत लिनुपर्ने बाध्यता देखिएको छ ।
