२२ चैत २०७९, मंगलबार
राष्टिय समाचार समिति(रासस)को सेवाग्राहीसँग रासस अभियानअन्र्तगत आज यहाँ कर्णाली प्रदेशका पत्रकारहरुसँग अन्तरक्रिया गरियो । नेपाल पत्रकार महासंघको कर्णाली प्रदेशको साधारणसभामा सहभागी हुन आएका महासंघको प्रदेशका जिल्ला अध्यक्ष र अन्य प्रतिनिधिहरुको सहभागिता रहेको थियो ।
सो अवसरमा राससका अध्यक्ष धर्मेन्द्र झाले कर्णालीको मिडिया विकासका लागि रासस सहकार्य गर्न तयार रहेको बताउनुभयो । कर्णाली प्रदेशका पूर्वमुख्यमन्त्री महेन्द्रबहादुर शाही र नेपाल पत्रकार महासंघका अध्यक्ष विपुल पोखरेललाई राससको प्रकाशन रासस हिजो र आज पुस्तक प्रदान गर्नुभएको थियो । कार्यक्रममा पूर्वमुख्यमन्त्री शाहीले कर्णालीको विकासमा राससजस्ता सञ्चार माध्यमहरुले पनि योगदान दिनसक्ने बताउनुभयो । महासंघका अध्यक्ष पोखरेलले राससले आम जनतालाई सुसूचित गराउन धेरै सञ्चार माध्यमहरुलाई आफ्ना ग्राहक बनाउन शुरु गरेको अभियान सकारात्मक कदम रहेको उल्लेख गर्नुभयो ।
राससका अध्यक्ष झाले कर्णाली प्रदेशको मिडियाको अवस्थाबारे आफू जानकार रहेको बताउँदै यस प्रदेशको मिडिया विकासका लागि सरोकारवाला निकायहरुसँग सहकार्य गर्न तयार रहेको उल्लेख गर्नुभयो । राससका बोर्ड सदस्य कृष्ण अधिकारी र बजार प्रमुख राजाराम कार्कीले पनि मुलुकमा सञ्चालित सञ्चार माध्यमहरुमार्फत आम जनतासमक्ष सूचना पुर्याउन धेरैभन्दा धेरै सञ्चारमाध्यमलाई राससको सेवा पुर्याउने अभियानलाई तीब्रता दिइएको बताउनुभयो ।
