१७ चैत २०७९, शुक्रबार
देशैभर आजबाट माध्यमिक शिक्षा परीक्षा (एसईई) परीक्षा सुरु हुँदा कर्णालीबाट ३८ हजार नौ सय ७० परीक्षार्थी सहभागी भएका छन् ।
शिक्षा विकास निर्देशनालय कर्णाली प्रदेशका निर्देशक दीपा हमालका अनुसार यहाँका १० जिल्ला गरी १९ हजार तीन सय एक छात्र र १९ हजार तीन सय ७९ छात्राहरु सामेल भएका छन् । आज बिहान ८ः०० बजेबाट सुरु भएको एसईईमा कर्णालीमा १७९ वटा परीक्षा केन्द्र सञ्चालनमा रहेको निर्देशक हमालले बताउनुभयो ।
दश जिल्ला मध्ये ३२ परीक्षा केन्द्र रहेको सुर्खेतबाट नौ हजार एक सय ३९ परीक्षार्थी संख्या सबैभन्दा बढी सुर्खेत र चार परीक्षा केन्द्र रहेको डोल्पा छ सय ९८ जना परीक्षार्थी एसईई परीक्षामा सहभागी भएको उहाँको भनाई छ । चौबीस परीक्षा केन्द्र रहेको दैलेखमा पाँच हजार सात सय ३५ परीक्षार्थीहरु सामेल भएका छन् ।
एक्काईस परीक्षा केन्द्र रहेको कालिकोटमा तीन हजार सात सय ६६, बीस परीक्षा केन्द्र रहेको जाजरकोटमा चार हजार छ सय ५६ र सत्र परीक्षा केन्द्र रहेको जुम्लामा दुई हजार आठ सय ७७ जना परीक्षार्थी एसईईमा सहभागी भएको जनाइएको छ । त्यसैगरी, २३ वटा परीक्षा केन्द्र रहेको सल्यानबाट चार हजार नौ सय ८३ र तीन परीक्षा केन्द्र रहेको रुकुमपश्चिममा चार हजार दुई सय १६ परीक्षार्थी सहभागी भएका छन् ।
छ परीक्षा केन्द्र रहेको हुम्लामा एक हजार दुई ३४ र सात परीक्षा केन्द्र कायम गरिएको मुगुमा एक हजार छ सय ६६ परीक्षार्थी सहभागी भए । कर्णालीमा ३८ हजार नौ सय ७० परीक्षार्थी मध्ये नियमिततर्फ ३७ हजार नौ सय र ग्रेड वृद्धितर्फ एक हजार ७० जना परीक्षार्थी रहेको निर्देशनालयले जनाएको छ ।
