२९ माघ २०७९, सोमबार
कर्णाली प्रदेश सरकारका प्रवक्ता एवम आन्तरिक मामिला तथा कानूनमन्त्री कृष्णबहादुर जिसीले दशजना द्वन्द्व पीडितहरुको स्वास्थ्य बीमा गर्ने घोषणा गर्नुभएको छ ।
नेकपा माओवादी केन्द्र भेरीगंगा नगरपालिका ६ सुर्खेतले २८औं जनयुद्ध दिवसको अवसरमा आयोजना गरेको कार्यक्रमलाई सम्बोधन गर्दै उहाँले आफ्नो सेवा सुविधावापत पाउने वेतनबाट कर्णाली प्रदेशका दशजना द्वन्द्वपीडितको स्वास्थ्य बीमाका गर्ने घोषणा गर्नुभएको हो । नेपालको संविधान, संघीयता, धर्मनिरपेक्षता, समानुपातिक र समावेशी शासन व्यवस्था आउनुमा जनयुद्ध नै मुख्य जग भएको बताउँदै उहाँले यही व्यवस्थाका खाँतिर घाइते, अपाङ्गता भएका मध्ये दश द्वन्द्वपीडितलाई बीमा गर्ने उहाँको भनाई थियो ।
“जनयुद्धको आधारमा नेपालमा निरंकुशता हटेको हो,” मन्त्री जिसीले भन्नुभयो, “तर सत्तारुढ दलकै केही जिम्मेवार नेताहरुले नै जनयुद्धप्रति गरेको टिप्पणी नकरात्मक छ ।” जनयुद्ध नेकपा माओवादी एक्लैले मात्रै गरेको नभई लाखौं नेपाली जनताको सहभागितामा भएकोले यसमा सबैको हिस्सा बराबरी रहेको भन्दै उहाँले यो दिन कसैलाई नभुल्न आग्रह गर्नुभयो ।
उहाँले भन्नुभयो, “चुनावको समयमा गठबन्धनलाई भड्काउने केही वामपन्थी दलहरु जनयुद्ध दिवसलाई नकारात्मक टिप्पणी गरेर मेलमिलाप भन्दा अशान्त वातावरण तयार गर्न उद्दत देखिनु रतिपनि राम्रो होइन् । यस्ता गलत सोचबाट माथि उठेर सबै नागरिक अघि बढ्नुको विकल्प छैन । बिगत होइन, वर्तमानमा देशलाई कसरी निर्माण गर्ने भन्नेतर्फ गम्भीर भएर लागौं ।”
