२८ पुस २०७९ बिहीबार
कर्णाली प्रदेश सरकारका मुख्यमन्त्री राजकुमार शर्मा आज पद तथा गोपनीयताको शपथ लिनुहुने भएको छ ।
आज दिउसो ४ः०० बजे कर्णाली प्रदेश प्रमुख तिलक परियारले नवनियुक्त मुख्यमन्त्री शर्मालाई पद तथा गोपनीयताको शपथ ग्रहण गराउनु हुनेछ । शपथ लिएसँगै सत्ता गठबन्धन दल माओवादी र एमालेका एक÷एक मन्त्री बनाएर तीन सदस्यीय मन्त्रिपरिषद् विस्तार गर्ने तयारी भएको मुख्यमन्त्री शर्माले जानकारी दिनुभयो ।
शर्मालाई प्रदेश प्रमुख परियारले बुधबार दावी पेश गरेलगत्तै नेपालको संविधानको धारा १६८ को उपधारा २ बमोजिम मुख्यमन्त्रीमा नियुक्त गर्नुभएको थियो । नेकपा माओवादी केन्द्र र एमाले कर्णाली प्रदेश कमिटिको बुधबार बसेको बैठकबाट ढाई÷ढाई वर्ष आलोपालो सरकारको नेतृत्व दुवै पार्टीले गर्ने सहमति भएसँगै एमालेको समर्थनमा मुख्यमन्त्रीले दावी पेश गर्नुभएको थियो ।
सहमति अनुसार मुख्यमन्त्रीसहित चार मन्त्रालय माओवादी र तीन मन्त्रालय एमालेले लिनेछ । आठ मन्त्रालय रहेको कर्णाली प्रदेशमा दुवै दलको बृहत छलफलपछि सात मन्त्रालय कायम गर्नेसमेत सहमति भएको जनाइएको छ ।
