१७ पुस २०७९, आइतबार
जिल्ला प्रहरी कार्यालय सुर्खेतका प्रमुख प्रहरी उपरीक्षक योगेन्द्रसिंह थापाले लागूऔषध रोकथामको विशेष कार्ययोजना बनाउन थालिएको बताउनुभएको छ ।
सुर्खेत प्रहरीको प्रमुख भएर आउनुभएका प्रहरी उपरीक्षक थापाले आज पत्रकारहरुसँगको भेटघाट तथा अन्तरक्रिया कार्यक्रममा लागु औषधको नियन्त्रण तथा न्यूनीकरण पहिलो सर्त रहेको बताउनुभयो । सुर्खेत कर्णाली प्रदेशको राजधानी भएकोले यसलाई सुरक्षित सहर बनाउने आफ्नो प्रयत्न गरिने उहाँले बताउनुभयो ।
“सुर्खेत कर्णाली प्रदेशको मुटु भएकोले तपाई पत्रकारहरुको पृष्ठपोषण र सुझाव लिएर अपराध नियन्त्रण र शान्ति सुरक्षाका काम अगाडि बढाउँछु,” प्रहरी उपरीक्षक थापाले भन्नुभयो, “पछिल्लो समयमा लागुऔषध समाजमा सबैभन्दा ठूलो चुनौति बन्दै गएकोले सुर्खेतलाई सुरक्षित सहर बनाउनमा जोड दिने योजनामा लाग्छौं ।”
सुर्खेतलाई सुन्दर, शान्त र सभ्य सहर बनाउन नागरिक, समुदाय, स्थानीय तथा प्रदेश सरकार लगायत सबै सरोकारवालाहरुको भूमिका महत्वपूर्ण हुने भन्दै उहाँले सबैले हातोमालो गरेर अघि बढ्नुपर्ने बताउनुभयो । लागु औषध ओसारपसार, चोरी निकासी, झगडा, घरेलु हिंसा, सामाजिक अपराध, कालोबजारी जस्ता कुराहरुको नियन्त्रण गर्न पत्रकार र प्रहरीको विशेष भूमिका रहने प्रहरी उपरीक्षक थापाको भनाई थियो ।
