११ पुस २०७९, सोमबार
कर्णाली प्रदेशसभाका नवनिर्वाचित सदस्यहरुद्वारा पद तथा गोपनीयताको शपथ ग्रहण गरेका छन् ।
कर्णाली प्रदेशसभाका ज्येष्ठ सदस्य विनोदकुमार शाहले आज दिउसो ३ः१५ बजेको समयमा प्रदेशसभा सदस्यहरुलाई पद तथा गोपनीयताको शपथ गराउनुभएको छ । प्रदेशसभा सदस्य निर्वाचन ऐन, २०७४ को दफा ७५ बमोजिम कर्णाली प्रदेशसभाको सदस्य पदमा निर्वाचित ज्येष्ठ सदस्य शाहले निर्वाचित अन्य सदस्यहरुलाई शपथ ग्रहण गराउनुभयो ।
६६ वर्षीय ज्येष्ठ सदस्य शाहलाई कर्णाली प्रदेश प्रमुख तिलक परियारले आजै शपथ ग्रहण गराउनुभएको थियो । उहाँले सभामुख र उपसभामुखको निर्वाचन नहुञ्जेलसम्म सभामुख भएर अध्यक्षता ग्रहण गर्नुहुने जनाइएको छ ।
कर्णाली प्रदेशसभामा नेपाली कांग्रेसका १४, नेकपा माओवादी केन्द्रका १३, नेकपा एमालेका १०, नेकपा (एकीकृत समाजवादी) र राष्ट्रिय प्रजातन्त्र पार्टी (राप्रपा) का एक÷एक र एक स्वतन्त्र गरी ४० प्रदेशसभा सदस्य रहेका छन् । ती मध्ये २४ प्रत्यक्ष् र १६ जना समानुपातिक प्रणालीबाट प्रदेशसभा सदस्यमा निर्वाचित भएका हुन् ।
