१७ भदौ २०७९, शुक्रबार
नेकपा (माओवादी केन्द्र)का अध्यक्ष एवं पूर्वप्रधानमन्त्री पुष्पकमल दाहाल (प्रचण्ड)ले सत्ता गठबन्धन सिट बाँडफाँडको सहमति नजिक पुगेको बताउनुभएको छ ।
नेकपा (माओवादी केन्द्र) कर्णाली प्रदेश समितिद्वारा सुर्खेत वीरेन्द्रनगरस्थित सिटी हलमा आयोजित पार्टी प्रशिक्षण कार्यक्रम सम्बोधनका लागि आज सुर्खेत आइपुग्नुभएको अध्यक्ष प्रचण्डले सुर्खेत विमानस्थलमा पत्रकारहरुसँगको भेटघाटमा गठबन्धनमा क्षेत्र र प्रदेश तोकेरै सिट बाँडफाँडको सहमति नजिक पुगिएको बताउनुभएको हो ।
गठबन्धन दलभित्र कुनै असहमति नभएको बताउँदै उहाँले भन्नुभयो, “यो पटक प्रतिनिधि र प्रदेशसभा दुवैमा सन्तुलित तालमेल गरिन्छ तर नेकपा एमालेसँग तालमेलको कुनै सम्भावना छैन । सत्ता गठबन्धनलाई नै बलियो बनाएर निर्वाचनमा होमिन्छौं ।” कर्णालीमा माओवादी केन्द्रको सरकार बनाउने गरी तयारी भइरहेको उहाँले बताउनुभयो ।
पत्रकार भेटघाटकै क्रममा अध्यक्ष प्रचण्डले आसन्न प्रतिनिधिसभाको निर्वाचनमा चितवन ३ बाटै चुनाव लड्ने बताउनुभयो । नेकपा (एकीकृत समाजवादी)सँग एकताका लागि प्रयास भइरहेको बताउनुभएका उहाँले निर्वाचनमा एउटै घोषणा पत्र ल्याउने पहल भएको तर चुनाव चिन्ह भने आ–आफ्नै हुने जनाउनुभयो ।
