१६ साउन २०७९, सोमबार
कर्णाली प्रदेश सरकारका मुख्यमन्त्री जीवनबहादुर शाहीले ‘महालेखा परीक्षकको चौथौं वार्षिक प्रतिवेदन, २०७९’ सभामा पेश गर्नुभएको छ ।
कर्णाली प्रदेशसभाको आज बसेको दशौं अधिवेशनको २८औं बैठकमा मुख्यमन्त्री शाहीले छलफलका लागि सभामा उक्त प्रतिवेदन पेश गर्नुभएको हो । सो प्रतिवेदन छलफलका लागि सार्वजनिक लेखा समितिमा पठाउन सभामुख राजबहादुर शाहीले सचिव जीवराज बुढाथोकीलाई निर्देशन दिनुभयो ।
त्यस्तै, सभामुख शाहीले समय दिएसँगै प्रदेश मामिला समितिका सभापति दानसिंह परियारले यस अघि कर्णाली प्रदेश सरकारका तर्फबाट सभामा पेश भएको ‘प्रदेशसभा सचिवालयसम्बन्धी ऐन, २०७५, संशोधन प्रतिवेदनसहित सभामा गर्नुभयो ।
यता प्रदेश सरकारका आन्तरिक मामिला तथा कानूनमन्त्री हिमबहादुर शाहीले ‘कर्णाली प्रदेश खेलकुद विकास ऐन, २०७६’ लाई संशोधन गर्न बनेको विधेयकमाथि समान्य छलफलका लागि सभामा प्रस्ताव गर्नुभयो । प्रदेशसभा सदस्य दल रावलले छलफलमा भाग लिँदै जिल्ला र कर्णाली प्रदेश खेलकुद परिषद् सदस्यका लागि जिल्लाका लागि छैटौं र प्रदेश सदस्य सचिव ११औं तह हुनेगरी राखिएको संशोधनको समर्थन गर्नुभयो ।
छलफल समाप्त भएसँगै सभामुख शाहीले उक्त विधेयकमाथि संशोधनको सूचना पेश गर्न ७२ घण्टा प्रारम्भ भएको प्रदेशसभा सदस्यहरुलाई जानकारी गराउनुभयो । प्रदेशसभाको अर्को बैठक साउन १८ गने बुधबार दिउसो ३ः०० बजे बस्ने उहाँले जानकारी दिनुभयो ।
