३० असार २०७९, बिहीबार
कर्णाली प्रदेशका मुख्यमन्त्री जीवनबहादुर शाहीले यहाँको आर्थिक विकासमा नीजि क्षेत्रको लगानी आवश्यक रहेको बताउनुभयो ।
मुख्यमन्त्री शाहीले आज सुर्खेतमा ‘गोरेटो बार रेस्टुरेन्ट तथा लाईभ म्युजिक बार’को उद्घाटन गर्दै कर्णालीको आर्थिक विकासका लागि गोरेटोले सहि गोरेटो पहिल्याउन सहयोग पुग्ने बताउनुभयो । विभिन्न उद्देश्यले कर्णाली पुग्ने पर्यटकहरुका लागि आरामदायी होटेल नभएको प्रतिक्रिया दिँदै उहाँले यसको थालनीले महत्वपूर्ण भूमिका खेल्ने जनाउनुभयो ।
उहाँले भन्नुभयो, “यहाँ राम्रो होटल छैन भनेर अहिले पनि कर्णाली आउनेले गुनासो गर्ने गर्दछन् । आरामदायी स्थान छैन भन्छन् । अब यो गुनासो गोरेटोले कम गर्ने छ ।’ उक्त बार राजनितीज्ञ, युवा अभियान्ता, कलाकार तथा खेलाडी हरि बिष्ट र पत्रकार ज्योति कटुवालले सयुक्तरुपमा सञ्चालनमा ल्याउनुभएको हो ।
बारको उद्घाटन समारोह बिहीबार, शुक्रबार र शनिबार गरी तीन दिनसम्म चल्नेछ । करिब चार करोडको लगानीमा सञ्चालित बारमा जुम्बा, टिपिकल डान्स, फुटसल, फेसिएल लगायतका सेवा सुविधा रहेको छ । सञ्चालक विष्टले गोरेटो कर्णाली प्रदेशका नागरिकको लागि साच्चै मौलिक गोरेटो बनाउने र कला, संस्कृति र सम्पदाको सारथी बनेर अगाडि बढ्ने जनाउनुभयो ।
