२१ असार २०७९, मंगलबार

कर्णाली प्रदेश सरकारले राष्ट्रिय बीमा कम्पनीमार्फत यहाँका विपद् पीडितहरुलाई रु.७८ लाख बीमा रकम उपलब्ध गरेको छ ।

प्रदेश सरकार आन्तरिक मामिला तथा कानून मन्त्रालयले चालु आर्थिक २०७८÷०७९ को साउन १ गतेदेखि असारसम्म बाढी÷पहिरो, चट्याङ, आगलागी जस्ता विभिन्न विपद्बाट ज्यान गुमाउने मृतक परिवारका ३९ जना हकवालालाई रु.७८ लाख भुक्तानी गरेको हो । यहाँका १७ लाख नागरिकहरुलाई विपद् सामुहिक दुर्घटना बीमा गरे अनुसार बीमा रकम उपलब्ध गराइएको मन्त्रालयका सचिव दिनेशसागर भुसालले जानकारी दिनुभयो ।

“अहिलेसम्म हामी कहाँ आएका ५३ विपद् पीडितहरु मध्य ३९ जनाले रकम प्राप्त गरिसकेका छन्,” सचिव भुसालले भन्नुभयो, “१४ मृतक परिवारलाई दिन बाँकी छ र उनीहरुको पनि अब छिट्टै भुक्तानी हुँदैछ ।” मृतक परिवार तथा स्थानीय तहबाटै कतिपय फाइलहरु ढिला आउँदा र विपद्बाट मृत्यु हुनेको संख्या थपिदै जाँदा पीडित सबैको एकैचोटी भुक्तानी हुन नसकेको उहाँले बताउनुभयो ।

राष्ट्रिय बीमा कम्पनी कर्णाली प्रदेशका प्रमुख शिवराज बिसीले ३९ मृतकका सबै खुल्ने कागजात आइसकेकोले सम्बन्धित हकवालाहरुलाई भुक्तानी गरिएको र पाँच जनाको केही कागजात नपुगेको बताउनुभयो । आठ जनाको भर्खरै आवश्यक कागजात प्राप्त भएकोले सबै प्रमाण हेरेर जतिसक्दो चाँडो भुक्तानी दिइने प्रदेश प्रमुख बिसीले जनाउनुभयो ।

आन्तरिक मामिला मन्त्रालय विपद् व्यवस्थापन शाखाका प्रमुख कृष्णबहादुर रोकायले चालु आव.०७८०÷७९ मा विपद्बाट सबैभन्दा बढी जाजरकोटमा १७ जनाको बाढी र पहिरोबाट ज्यान गएको जानकारी दिनुभयो । त्यस्तै, हुम्लामा बाढी, पहिरो र हावाहुरीबाट सात, कालीकोटमा पहिरो र भिरबाट खसेर पाँच जनाको मृत्यु भएको उहाँले बताउनुभयो ।

शाखा प्रमुख रोकायका अनुसार सुर्खेतमा बाढीबाट पाँच, जुम्लामा आगलागीबाट चार र रुकुमपश्चिममा बाढीबाट तीन, दैलेख दुई डोल्पामा पहिरो, मुगुमा हिम पहिरो र सल्यानमा चट्याङबाट एक÷एक जनाको मृत्यु भएको छ ।

प्रदेश सरकारको ‘विपद् जोखिम बीमा सम्बन्धी कार्यविधि, २०७६’ अनुसार विपद्बाट मृत्यु भएका परिवारका लागि रु.दुई लाख र आवास बीमाअन्तरगत रु.पाँच लाख उपलब्ध गराउने उल्लेख छ । तर आवासको बीमा हालसम्म चालु नभएको जनाइएको छ ।

त्यसैगरी कार्यविधिमा कर्णाली प्रदेशमा स्थायीय बसोबास भएका नागरिकहरुको हकमा देशका जुनसुकै भूभागमा विपद्को घटनामा मृत्युमा मृतकका हकवालालाई बीमा कम्पनीले क्षतिपूर्ति प्रदान गर्नेछ, भनिएको छ । त्यस्तै, नेपालको जुनसुकै स्थानमा स्थायी घर भई प्रदेशका सरकारी, गैर सरकारी संघ, संस्था वा अन्य निकायमा कार्यरत व्यक्तिहरुको समेत विपद् दुर्घटनाका कारण मृत्यु भएमा बीमा कम्पनीले क्षतिपूर्ति प्रदान गर्नेछ ।

कार्यविधि बमोजिम जोखिमग्रस्त क्षेत्र आवास बीमाअन्तरगत बीमालेखले अग्नि, भूकम्प, बाढी÷जलमग्न, पहिरो÷जमीन धसिने वा भासिने, हावाहुरी, हिमताल तथा ज्वालामुखी बिस्फोटन, आँधीबेहरी, चट्याङ, शीतलहर, असिना, र भिरबाट लडेर हुने आकस्मिक दुर्घटना जोखिम विरुद्ध सुरक्षण प्रदान गर्ने उल्लेख गरिएको छ । यस अघि कोभिड–१९ बाट मृत्युभएकालाई पनि विपद् जोखिम दुर्घटना दिने भनिएपनि अहिले भने त्यो हटाइएको छ ।